Ka jing iadei ka NPP bad ka BJP

Bah Monarch Shabong

Ki 4 ngut ki MLA jong ka seng NPP, ki la mih noh na ka sorkar BJP ha Manipur bad ki la iaid shakhmat ban leit iasoh bad ka seng Congress, da ka jingthmu ban thaw ia kawei pat ka sorkar ha katei ka Jylla. Ngim tip, la ka jing ialeh jongki, kan long kaba jop ne kaba rem, hynrei ia katei ngin nym iakren eh hangne bad ngin iakren ia ka jing iadei jong ka NPP bad ka BJP nangne shakhmat.

Ngi kynmaw shisnem tam ne duna mynshwa, U Biren Singh, u myntri rangbah ka Manipur, ula ther tyngeh ia U Conrad Sangma, nongialam ka seng NPP, ba u ong ba u dang dei u khynnah rit jong ka Shillong. Halor ka jing ia kynad ha Manipur, ngi iohi, ba la shibnai tam eiei, ba U Biren Singh, ula knieh lut ia baroh ki kam na U Deputy Chief Minister jongu, uba dei ruh u nong ialam ba heh duh ka seng NPP ha Manipur bad katei ka la pyni, ia ki dak ba U Singh, um kwah shuh ban dang ia don bynta bad katei ka seng, ha ka sorkar ha katei ka Jylla.

Hap iakren ia ka jingiadei jong ka BJP bad ka NPP ha Meghalaya ruh bad ngi dang kynmaw, ba khyndiat bnai mynshwa, ba ki MDC jong ka BJP, ki la jan ioh thaw Executive Committee ha Garo District Council bad katei ka pyni ba kine kim aili satia, lada ki ioh lad ban dung na khmat ne na dien ruh, na bynta ka jing myntoi jong ka seng jongki. Ym tang katta, ki MDC ka seng BJP, ki la ju thaw ia ki kam bamsap ha Jaintia District Council, ha kaba ia ka Council, la khlieh da ka paralok ba ia ieid jongki ka NPP.

Ki don shibun kiwei pat ki phang, kiba ngi la nang iohi, hynrei ngi hap ban kynmaw ia ka jing ia kynduh kaba shiteng synnia lane jan shai ha Delhi, ban iakren ia ka inner line permit (ilp), ha kaba U Amit Shah, myntri kam poh iing, ula shu kular kai ia ki nongialam ka NPP lem bad ki seng trai ri, da kaba u ai mynsiem, ba kin ialeh kmen khristmas 2019 shwa bad ban sa iakren biang ha u snem 2020.

Ngim tip, U Conrad Sangma, uba la shu shaniah tylli ialade ha ki heh BJP, ula iohi ne em, ia ki dak kiba eh, ha ka jingiadei jongu bad katei ka seng; hynrei haba shu peit, na ki kam pynroi, na ka jingbei pisa ia ka khlam covid bad nangta sa ka jingleh mynthi ka myntri pla pisa jong ka sorkar India, nangta ka ishu dewiong bad kiwei kiwei, ka paw shai, kumba ha shwa u snem 2023, ka BJP kan sa leh da kaba kham tyngeh ban pynjot thiaw ia ka NPP.