Balei ban khanglad ia ki trai shnong?

Bah Monarch Shabong

Ngi iohi ha kine ki sngi, ba ki la sdang mih sa ki dorbar shnong, kiba khang lad ia la ki jong ki para shnong, ban leit bylla, ban leit kai sha ki shnong ki thaw bad ki jaka shangkai pyngngad bapher jong ka Ri Khasi Jaintia.

Ka jing pyrkhat kaba da sngew danda shisha, namar ba ngi ia pyrshah ba kin wan trei bylla, kiba nabar, hynrei lada ngi ia pyrshah, sa ia ki trai shnong, kumta kumno ngin khmih lynti, ba kin iaid ki kam ki jam bapher, ha ka trei iing trei sem, ha ka trei karkhana, ha ka trei surok bad kumta ter ter.

Kam dei tang katta, hynrei, la iohi ba ki la mih ki kyndon, ha kaba la khang ruh ban leit rung sha ki shnong ki thaw, sha ki jaka shangkai bapher, da ki katto katne ki kynhun lane ki shnong.

Ka mat kaba kongsan, ka long ba ki kam ki jam, ki dei ban iaid bad nangta ka leit ka wan da ki para shnong, ki marjan shnong bad ki para khasi khara, lane ki trai shnong trai thaw, ym bit satia ban khang bad ha katei ka dur, ki dukan kin ioh ia ki nongbam, ki nongdie jhur, kin ioh ia ki nongthied, ki jaka sah miet, kin don ia ki nongsah, ki nongtrei iing, kin ioh misteri bad sa ki jaka shangkai, kin dei kiba leit ia shong pyngngad bad ter ter.

Ngi la tip shai ba ki Khasi jongngi, kim don satia ia katei ka jingpang khlam coronavirus (lait noh tang kito kiba don ha ki quarantine centre) bad haba ka long kumta, ka rung ka mih jong ki para khasi, na kawei ka jaka sha kawei pat, kam don jingma satia, tangba ki shu dei ban bud ia ki kyndon jong ka jing ia jngai iwei ia iwei pat bad nangta ba kin tap ia la ka shyntur, haba ia kren bad ki riew phylla.

Ka sorkar Jylla, ka la kren shai ba kam shah ia ki briew kiba nabar, ba kin wan rung ia mynta bad katba kum kitei ki kyntien, ka la shai kdar, ba kiba ia iaid ia ieng, kin dei beit ki trai shnong suda bad ki sengbhalang, ki dorbar shnong, ki dei ban pynjynsur ia ki kyndon bad lada kitei jaka sah miet, ki jaka bam, ki jaka shang kai kim thew na ka bynta ki trai shnong, kumta ka pyni ba ka sorkar Jylla ruh ka la bakla pleng, ba ka shu plie ia ki, haba kam pat shah ia ki briew kiba na bar.

Lyngba kitei ki jing shisha, ngi la dei ban sdang noh ia ka iaid ka ieng, ka trei ka ktah, ka kamai kajih jong ki para ri, kiba don ha kylleng ka Ri Khasi Jaintia bad ngi dei ban ia sngewthuh para ma ngi hi, ba ngin nym knieh noh ia u khiew ja ki para ri, namar ba kane ka jingkhang ka la ktah jubor ia kiba bun ki para ri jongngi, kiba donkam lajong bad khamtam ia ki nongbylla ruh kumjuh bad ka dei kane ruh ka por ba ngin peit ia ka kamai kajih, la ka kiew ne ka hiar, haba ngi ia trei hi para ma ngi.