Da ka pakhang surok ba khlem buh por, byrngem ki nongniah trok

Shillong: Myn hynnin ka sngi ka kynhun ki nong niah trok kiba kynthup ia ka Joint Action Committee (JAC) jong ka Jaintia Hills Truck Owners’ and Driver Association (JHTOA), Meghalaya Truckers’ Union (MTU) bad ka All Jaintia Cement and Clinker Transports Association (AJCCTA) mynta ka sngi ki la wan ban ia kynduh ia u Commissioner ka tnat ‘Transportation’ ban pyngsngew iaka jing bym treh ki karkhana dewbilat ban iaid katkum ka dor ba la buh bthah da ka sorkar Meghalaya.

Na ka liang u bah Nidamon Chullet u present ka JAC, u la iathuh ba haduh mynta baroh ki karkhana dewbilat, kiba don hapoh ka thain Jaintia Hills kim treh ban iaid katkum ka dor ba la bthah ka sorkar, na ka bynta ban kit ia ki dewbilat napoh ki karkhana sha kiwei pat ki jaka ban die.

“Ka sorkar Meghalaya ha u bnai kyllalyngkot ka la pynmih ia ka dor na ka bynta ban kit ia u dewbilat haka dor 9 tyngka per MT per KM lyngba ka surok siang rong, 10 tyngka per MT per KM lyngba ka surok siang maw bad haka dor 12 tyngka per MT per KM lyngba ka surok ktieh, hynrei haduh mynta baroh ki karkhana dewbilat kim pdiang ia kane ka jing btah ka sorkar” la bynrap u bah Nidamon Chullet.

Nalor kane u bah Nidamon Chullet, u la ong ruh ba haduh mynta ki kynhun ki nong niah trok kit dewbilat ki ju pyni iaka jing pyrshah tang da ka jing ia khih ba jar jar bad lada ki karkhana kim burom ia ka jing bthah ka sorkar, ki kynhun kim banse ban iakhih da kaba tyngeh kata da ka jing pakhang surok ba khlem buh por ban khanglad ia ki karkhana dewbilat ban shalan ia ki mar jong ki.

Ki dkhot ka seng JHTOA ki la pynpaw ruh ba jan baroh ki karkhana hapoh ka rilum jaintia ki kynnoh ba ka sorkar haduh mynta kam pat phah ia ka hukum ha ba dei bad ki dor na ka bynta ban kit dewbilat bad ki siew beit tang 4 haduh 5 tyngka shi MT na ka bynta shi KM.
Ha badei bad ka jing kular u Commissioner ka tnat Transport, na ka liang u Bah Nidamon Chullet u la ong ba la aiti sha ka ophis treikam DC ka East Jaintia Hills na ka bynta ban pynlong jing ialang ryngkat bad ki karkhana dewbilat bad ki kynhun ki nong niah trok ha ka 18 tarik jylliew 2020.