KA DOHNUD KABA SHEPTIENG IA U BLEI

Rev.B.P.Pohsngap

La iohi ha kane ka Jingim ba ki briew ki bym pat aiti ha U Trai, kim don ka jingsheptieng ia U Blei. Ka kitab Proberb 23:26, ka ong “ko khun to ai ha nga ia ka dohnud jong me, bad to ai ba ki khmat jong me kin sngewbha ha ki lynti jong nga “. U Blei U pan ia la ka dohnud jong u briew, khnang ba un ioh shong ha ka, bad haba U Blei U la ioh shong ha ka, kata ka dohnud ka lah ban sheptieng ia U Blei. Ki briew kiba don ka dohnud kaba sheptieng ia U Blei ; ka paw ka dur Blei ha u briew. Ka kitab Jenesis 1:27 ka ong “kumta U Blei U la thaw ia u briew ha ka dur jong U hi, ha ka dur U Blei kein U la thaw ia u shynrang bad Kynthei U la thaw ia ki ”kum ki jingthaw ba kordor jong U Blei to ngin peit ia lade marwei marwei la ngi don ne em KA DOHNUD KABA SHEPTIENG IA U BLEI. U Blei u kwah eh ban iohi ia ngi la ngi don ne em ka jingim kaba sheptieng eh ia U. Ka kitab Deuteronomi 10:12-13 ka ong kumne “mynta te, ko Israel U Trai Uba U Blei jong me U kwah aiu na me, tang ba men sheptieng ia U Trai Uba U Blei jong me, bad ba men iaid ha ki lynti jong U baroh bad men ieit ia U bad men shakri ia U Trai Uba U Blei jong me da la ka dohnud baroh bad da ka mynsiem baroh, bad men sumar ia ki hukum jong U Trai bad ia ki ain jong U, ia kiba nga hukum ia me ha kane ka sngi, na ka bynta ka jingbha jong me”. Katto katne ki mat kiba nga kwah ban kdew – KA DOHNUD KABA SHEPTIENG IA U BLEI :-

1. Ka pyrshah ban kohnguh ia ka ban leh ia kano kano ka kam ka ban ktah ia ka mon jong U Blei :
   Kano kano ka jingleh kaba ia dei shimet ne ha ka ing ka sem, ne ha ka imlang sahlang, ne ha ka Balang shnong, ha ka circle, ha ka District wat ha ka Assembly baroh kawei; lada don kaba pyrshah ia ka mon jong U Blei, ban long ka pop, dei ban pyrshah tyngeh, ym bit ban ia pyndem lang ioh ia bit pop lang. Kum u shakri barit jong U Trai nga don ka jingiohi ha ka Balang ba ki long kpa ki la leh sting shi katdei eh, ba ia kaba long pyrshah ia ka mon jong U Blei ki kdup ki kynthup ia kata ha la ka jingleh, bad kane ka long ka dak kaba ktah ia ka pyllew khmat jong U Blei; nga la ima bad i shyrkhei haduh katta katta. Bad dei kane kaba u Jeremaiah 23:13-14 U ong “Bad nga la iohi ia ka jingbieit ha ki nongiathuhlypa ka samaria, ki la iathuh lypa da u BAAL, bad ki la pynbakla ia ki briew jong nga ki Israel. Ha ki nongiathuhlypa ka Jerusalem ruh nga la iohi ia kaba shyrkhei ; ki klim bad ki iaid ha ka jinglamler bad ki pynkhlain ia ki kti ki nonglehsniew, kumta ba ym don shuh uban phainoh na la ka jingbymman; ki baroh ki la wan long ha nga kum ka Sodom bad kiba shong ha ka kum ka Gomorah”. Nga ainguh ia U Blei ban iohi ia ki longkmie arngut kiba dap shynrang ka jingsheptieng Blei ha ki , ki pyrshah ban kohnguh ia ka ain U Syiem ka ri Ijipt bad dei da kane ka jinglong jong ki ka sa wanrah ia ka jingroi ki khun Israel. U syiem ka ri Ijipt u la hukum ban pyniap ia ki khunlung shynrang mar ia kha na ki Kynthei Hebru, hynrei kine ki arngut, ka Shiprah bad ka Purah, kim pdiang ban leh ia kata namar ki long kiba sheptieng ia U Blei. Ka kitab Eksodos 1:15-22. “Te namar ba kita ki nongbat khun ki la sheptieng ia U Blei , ki Hebru ki la nangroi ”ko kiba ieit jong U Trai to long bad to ioh ia KA DOHNUD KABA SHEPTIENG IA U BLEI, wat ngeit wat pdiang ia kito ki nongiathuhlypa lane ki Pastor kiba pynbakla ia ka lynti U Trai ym kat kum ka ktien U Blei.
2. Ka nud ban ong em ia ka pop kaba pynjot ia ka long rynieng ka Jingkhuid:-
   Ha kine ki sngi kiba mynta ka jingsniew ki briew kaba i kynsha shisha, kim sheptieng shuh ia ka pop pynkhein burom ia ki briew kiba lui lui bad kiba jemnud. Ka jingleh jubor ia ka kam longkha longman kaba i shyrkhei. Don bun ki samla kiba thmu ban ieng skhem ban ioh pyndonburom ia U Blei hynrei ynda ki la ia jan ia ieit ia sngewbha, bad kiba don ka mynsiem pynjot pynsniew ki duh noh ia ka jinglong sotti ba janai ba U Blei U la buh. Ban ia kren ia kane ka bor jingshlur ban ong em ia ka pop, ngim lah khlem da kdew sha ka jinglong bashlur jong u Joseph ban kyrngah ban phet noh na kti jong ka tnga u Potiphar kaba la thmu ban bat jubor ia U Joseph. Ym ju kham iohsngew ba ka Kynthei kan bat jubor ia u shynrang briew. Ka kitab Jenesis 39:12, ka ong . “Bad ka la kem bat ia u na ka jainkup jong u , ka da ong to thiah lem bad nga; u te u la iehnoh ia la ka jainkup ha ka kti jong ka, bad u la phet noh soit, bad u la mih noh sha khyndew.” Ko ki khun samla, ko kiba ieit U Trai; to long kiba shlur ban ong em ia ka pop kaba pyntngit ia ka rynieng ka Jingkhuid. Don ruh ki briew kiba da ka buit sainti ki riam ki phon ia ki briew tang ba kin poi sha ka jingjot. Uwei u briew uba kyrteng u Jonadap, u la ai buit ia u Amon ban riam ia ka Tamar, ba kan ngat ha ka buit sianti jong u, bad ka Tamar ka la duh noh ia ka jinglong sotti jong ka namar u Amon u la pynkhein burom ia ka na ka jinglong samla ba shisha. Ka kitab kaba 2 U Samuel 13:1-14.
3. Kam ju iaid ne leh la ka jong ka mon:-
   U Blei U la ai ha u briew ia la ka jong ka jong ka mon ha lade, ba u briew un lah ban pyniadei ia kata ka mon kaba lah ban iadei lang ne ia sngewthuh lang. Kano kano ka mon ka bym lah ban ia sngewthuh lang, kata ka dei ka mon ka ban ialam sha ka ban dkut ka jingiadei. Don bun ki briew kiba pyndkut noh ia ka jingialong kawei da kaba iaid la ka jong ka jingsngewthuh wat na ka lynti ka bym dei. U Jisu U la ai ka jingkren da ka pharshi u khun sarong awria uba shim rai marwei khlem burom shuh ia la u jong u kpa ha la ing. Kane ka pharshi – Loukas 15:11 -24. Ka pyni ba u khun iaid mon, u khun rai marwei , u khun tamsneng, uba iuh roit ia ki jingsneng jingkraw na la ing , u mih noh bad phet jngai na la ing. U kpa u la sngap jar, um leit wad namar u khun uba la phet khnang. U kpa u plie rynghang ia la ka jingkhang mynmiet bad mynsngi da kaba kyrmen lano u khun un wan phai sha la ing. Na ki jingshem jingjynjar kaba la ktah eh ia ka jingim kaba man ka sngi, u khun u la kyndit bynriew bad wan phai noh sha la ing. U kpa da ka jingkmen u la pdiang ryngkat ki jingpynkup burom ia la u khun tam sneng. Kane ka pyni ia ka jingieit kaba shisha ban map ban klet ia kito ki khun iaid mon, iaid sakma ban iehnoh ia ka lynti iaid sakma ban phai pat sha la ing.

Ka Jingpynkut:-
Kaba kongsan eh ka long ban tynjuh ban iit ialade marwei marwei kum ha khmat jong U Blei uba iohi lut, Uba tip lut, la ngi don ne em ka mynsiem shynrang ban long kiba lah ban ialeh pyrshah shisha ia KA BAN KOHNGUH IA KA BAN LEH IA KANO KANO KA KAM KA BAN KTAH IA KA MON JONG U BLEI bad ban don ka jingshlur BAN NUD BAN ONG EM IA KA POP, KABA PYNJOT IA KA LONG RYNIENG KA JINGKHUID bad ban iai bat ia ka jinglong jingim kaba kut jingmut BAN NYM IAID HA LA KA JONG KA JINGRAI MARWEI bad da kine ki jinglong Kiba lah ban pynpaw ia KA DOHNUD KABA SHEPTIENG IA U BLEI…..
AMEN*