Bym biang tiar iada COVID-19, iakhih ki nos ka hospital NEIGRHIMS

Shillong:Ki nongtrei ka hospital North East Indira Gandhi Regional Institute of Health and Medical Sciences (NEIGRIHMS) kiba naka kynhun ka Trained Nurses Association of India bad ka NEIGRIHMS Nurses Association myn hynnin ka sngi ki la mih ban pyni ia ka jing pyrshah ia ka jingleh jong ki bor pyniaid ka hospital, da kaba kynnoh ba ka hospital kam shim khia satia ban iada iaki nongtrei na ka jingshah ktah haka jing pang ‘corona virus’.

Ka kynhun ki nongtrei ka Hospital NEIGRHIMS ki la kynnoh ba ka hospital kam pynbiang ia ki tiar iada na ka khlam ‘COVID-19’ bad ruh ki bor pyniaid ka hospital ki la phah ban leh ‘quarantine’ iaki nongtrei kiba don duty hapoh ‘COVID Ward’ hala ing.

Katkum ka jingiathuh kine ki nongtrei, ki don 9 ngut ki nurse kiba trei hapoh ka ‘ward’ ba don kiba ioh Covid 19 bad kiwei pat ki nongiarap, bad ka jingiakhih jong ki ka long ban dawa jaka ba kyrpang ban leh quarantine na ka bynta kito kiba trei hapoh Covid ward, namar watla ki la sop da ki PPE, hynrei ym lah ban pynshisha pat haduh katno ki PPE ki lah ban iada.
Ki nongtrei ka Hospital NEIGRHIMS kila ong ruh ba kane ka jingleh jong ki bor pyniaid ka lah ban wanrah jingma ia ki ba ha ing hasem, bad ki la dawa ba ki bor pyniaid ban ai da ka jingthoh paidbah baka NEIGHRIMS kan shim da ka jingkitkhlieh lada jia ne shah ktah ki ba haïing ne ki paramarjan jong ki nurse kiba trei hapoh ‘Covid Ward’.