Tih thurmur ka kompeni ia ka surok Four lane: Jemino

Shillong, 7 Risaw:
Ka UDP ka la lap ba ka jingtih ia ka surok bah Fourlane ka long kaba thurmur namar ba ka kompeni ka la shu tih lymmuh ia ki lum.
Haba iakren bad u Working President ka UDP u Bah Jemino Mawthoh uba la pynlong ia ka jingjurip ia katei ka surok mynta ka sngi hadien ba la mih ka jingiap briew na ka jingtwa ka khyndew, u la ong ba ka long kaba pangmet ban iohi ia ka rukom pyntrei ia kane ka surok naba ka long thurmur bad lymmuh bha.
“Ka kompeni ka la shu tih ka la shu ot ia ki lum lymmuh bad pathar khlem da bud katkum ki kyndon ba la pynkhreh ha ka DPR”, la ong u Bah Mawthoh.
U la ong ka UDP hadien ba la lap bad iohi ia kane, kan sa ai jingmut sha ka sorkar ba ka dei ban thung ia ka jingtohkit ban pynthikna ba ka kompeni kaba pyntreikam ia kane ka surok naduh Jorabat haduh Lad Umroi ka dei ban bud ia ki kyndon.
Katkum ka jingong jong u Bah Mawthoh, ha ka DPR la kdew shai ba ia ka khyndew dei ban tes ban tih katkum ka kyndon ym ban shu tih pathar bad thurmur.
“Haba wan kane ka surok, ngi kmen shi katdei eh hynrei mynta ka long pynban ka jingsngewsih haduh ba la mih ka jingiap briew namar ka jingtih thumur”, la ong u working president ka UDP.
Hynne ka UDP hapoh ka jingialam u Bah Mawthoh ka la pynlong ia ka jingjurip ia ka jaka kaba ha Umling kaba twa haduh ba la mih ka jingiap briew ha kine ki sngi.
“Ia kane la bun bnai, ngi la kyntur ia ka sorkar ba kan shim khia pynban kam shym la leh”, la ong u Bah Mawthoh.
u la ong ba ka jingiap briew na kane ka jigntwa ka khyndew ka dei ka kam beain kaba mih na ka jingleh torti jong kiba pyntrei ia ka.
Ha ka jingshisha katkum ka DPR dei ban bud ia ki kyndon thik pa thik, hap tes ia ka khyndew, bad ka jingpom ia ki lum ruh kam dei ban long thurmur, la ong u working president ka UDP.
U la ong ba kaba ima ka long baroh shi lynter ka surok ka long kaba ima, ia ka rukom tih ia ki lum.
“Na ka liang jong ngi, ngi dawa ba ka sorkar ka dei ban thung ia ka komiti kumno kin pyntreikam ia kane, dei ban don ki lad iada ha ki jaka ba don jingsyier namar ba lah ban mih biang ka jingjia lada ym shim ia ki lad jingiada”, la ong u Bah Mawthoh.
U la ong ba kane ka surok ka dei kaba bunkam tam ha kaba da ki hajar ki kali ki iaid man ka sngi kiba leit wat shabar jylla ruh ki iaid na kane ka lynti bah hynrei lada jia ba kan twa biang, kaei kaban jia.