Ujor ka HNYF, ia ka jingeh ki nongrep

Shillong:Myn hynnin ka sngi ka Hynniewtrep National Youth Front (HNYF) ha ka jing ialam u samla Donbok Dkhar, ki la leit ban iakynduh ia ka Joint Director ka tnat rep ka riang ka kong L. Kharkrang, na ka bynta ban pynsngew ia ka jingeh ki paidbah khamtam ki nongrep ban register ia ki jaka rep jong ki.

Na ka liang u samla Donbok Dkhar, u iathuh ba ka seng ka la wan hadien ba ki nongrep ki la ioh ia ka shithi na ka tnat ka rep ka riang bad ka shithi ba tang uwei na ka long ing u lah ban ioh jing myntoi naka ‘PM Kisan Scheme’.

“Ka jing bthah ka tnat ka rep ba tang uwei na ka longing ba lah ban register ia ka jaka ban rep kam lah ban long namar hapoh Meghalaya bun ki longing ki ia sah lang, hynrei bun pat ki don bynta ban rep bad namar kane ngi kyntu iaka tnat rep ka riang ka jylla ban pynkylla ia kane ka jing bthah” la bynrap u samla Donbok Dkhar.
Haba dei bad ka jing kular na ka Joint Director ka tnat rep ka riang, u samla Donbok Dkhar u la iathuh ba i Joint Secretary ka la kular ia ka seng ban buddien ia kane bad ka sorkar Meghalaya ka dang ap ia ka jing mynjur na ka sorkar India halor ka jing dawa ki nongrep ka jylla.
Na ka liang ka HNYF ka la kyntu ia ka tnat ka rep ka riang ban lum jingkhein biang ia ki nongrep ka jylla daka ba iaid lyngba ki Nongsynshar Shnong khnang ban ioh lum jingkhein kaba iahap ban myntoi ia ki paidbah khamtam ki nongrep.