Ka iktiar ki Rangbah Shnong

Bah Monarch Shabong

Ha ki khyndiat sngi ba ladep, ngi dang dep iakren ia ka iktiar jong ka Khasi District Council bad ha katei ka mat, ngi iakren shaphang ka jing lushia lut ki bor District ia ki dukan sha ki shnong ki thaw, ban shim kyrteng, ban ithuh ia ki bad ban phah plie bad phah khang bad ha katei ka rai jong ka sorkar, ka Khasi District Council ka shu peit kai na rud.

Ym tang katta, la iohi shuh ba ka District Council, ka kren kob, da kaba ong, ba ki bar Jylla, haba ki kwah ban wan biang sha Ri Khasi, ba kin da leit pan jingbit na ka Council bad katei ka dei ka mat, kaba iahap ban shu kren, katba kam lah ban trei kam shisha.

Ngi ia wan mynta sa sha ki Rangbah Shnong bad ka iktiar jongki, khamtam, ha kaba iadei bad kane ka khlam covid bad haba shu peit, ngi iohi ba ki Rangbah Shnong, ki shim ia ka kam jong ki kynhun sengbhalang bad ki kit ki bah, ia ka khia ka shon, kaba ka sorkar kam lah lane kam don bor, hynrei ma ki, ki shimti ia katei ka jing kitkhlieh ia ka sumar sukher ia kitei kiba pang bad kiba wan na shajan bad shajngai.

Khlem da ia kren jngai ia kane ka mat, la shu iohi, ba ka jing sumar ia kito ki khun samla, kiba wan shabar, ka dei ka jingsngew kitkhlieh hi jong ki bor shnong bad dei na kata ba ki pynlut ia ka bor ka sor, ka pisa pilain, wat la ka sorkar, kam shym la iarap eiei ruh.
Ka jingjia ha Mawryngkneng, ha ki khyndiat taiew ba ladep, ka pyni shai ba ki briew jong ka sorkar, kim shah shkor satia ia ki bor shnong bad kam dei tang kata, hynrei la iohi ba haduh mynta, ki Rangbah Shnong, ki trei jar jar, halor ka kam jongki bad kim ju paw satia ha ki jingtrei kam jong ka sorkar, ha kaba iadei bad ki quarantine centre, ba ki pyniaid bad nangta sa shibun bah ki kam ba ki leh, ha kaba pahara ia ki shnong ki thaw, haba peit ia ka suk ka sain, ka sam bam sam dih bad wat ia ka jing phikir bad hikai shaphang ka jingma jong ka khlam corona.
Ka kashari jong ka Meghalaya High Court, ka la sloi ia ka bor jong ki Rangbah Shnong, ha u snem 2015 bad mynta, ka donkam ba kine ki Rangbah Shnong, kin treikam kum ki iktiar kiba khlain bad kata ka long ba kim dei ban long kum ki sengbhalang, hynrei ba kin don ia ka bor ban tuklar bad ban synshar ia ki shakri sorkar lane kumba ju tip, kum ki third class majistret.