Pynsaja kaba tyngeh ia ki nongpyniap briew, dawa ka MSCW

Shillong 6 Risaw:
Ka Meghalaya State Commission for Women (MSCW) ka la dawa da ka jingpynsaja kaba tyngeh ia ki briew kiba donkti ban shim ia ka jingim jong ka khynnah ba 15 snem ha East Garo hills district.
“Ngi kyntu ia ka sorkar jylla bad ka tnad ba dei peit ba kan pynngat da ki kyndon ba tyngeh ban pynsaja ia ki briew kiba pyniap ia ka khynnah”, la ong ka chairperson ka MSCW ka Kong Theilin Phanbuh ha kane sngi Nyngkong haba kren sha ki nongthoh khubor.
Ka kong Phanbuh ka la ong ba ka jingiam bein ia ka khynnah ba lui lui ka Grikchina N.Sangma, ka khynnah pule jong ka Sacret Heart H.S.School ha Kusimkolgre, William nagar, ka la long ka kam riew khlaw.
Ka MSCW ka pyn rem jur ia kane da ka jingsngew khia bad ka jingpang mynsiem kaba long pyrshah ia ka jinglong briew.
“Ki kam thombor ia ki kynthei ka la nang kiew na ka sngi sha ka sngi, kumno shuh ngin iai shah ia kane ka kam beain jong ki riew runar”, la ong ka Kong Phanbuh.
Ia katei ka khynnah la lap ha kaba ka khlieh, ki kti jongka la pra na kawei ka khlaw kaba don ha East Garo hills district. Ki pulit ki la ong ba katei ka khynnah ka la jah na jaka sah jongka kumba shi taiew shwa ban lap ia ka met iap jongka.
Ka met lyngkhuit jongka kaba la pyut la lap na ka khlaw hajan ka ka jaka kaba tip kum ka Songsak kaba jngai khyndiat na ka shnong Kisumgolgre ha katei ka district.
Ki pulit ki dang ap ia ka repod jong ka post mortem na ki doktor.