Wat la phi mad ia ka jingpang Covid-19, wat sheptieng nga long U Blei jong phi

Scholar Lawriniang Nongthliew WKH
9366576277

Ka jingmih ka khlam Covid19 ka la pynpat ñiangkhriat shiaha ia ka pyrthei baroh kawei, ha kaba la khang kyrdep lut ia baroh ki jait kam wat ia ki skul bad ki jaka mane blei. Kane ka khlam ka la pyntieng pynsmiej shisha wat ia ki bym pat mad ruh. Hynrei Ah katno tam leilei ia kito ki ba la mad ia kane ka jingpang kiba la ia kynduh da lade ha kaba kane ka khlam shyrkhei ka la ioh ban thaw jingpang ha ka met jong ki.

Kane ka lah ban pyntieng arshah bad pynduh jingkyrmen ruh ia kiti kiba mad ia kane ka jingpang khlam. Hynrei wat la phi mad ha lade ia kane ka jingpang, tangba wat sngewsheptieng namar U Blei un pynkhiah ia phi lada phi don ia u Blei ha ka dohnud jong phi. Namar ym don kiei kiei baroh kiba lah ban pynkylla noh ia ka jingieit U Blei ia u khunbynriew kat haduh kine ki sngi ka dang paw tyngkrein ka jingieit U Blei ia u khunbynriew shi snieh pyrthei.

Ka jingieit U Blei ka dang paw shynna ha u wei pa uwei u briew kat haduh mynne mynta. Namar ym tang ka jingpang khlam kaba don ha ka pyrthei hynrei bun byllien kiwei kiwei ki jait jingpang kiba shyrkhei kiba ngim lah ban jer lut ia ki kyrteng jong ki, hynrei haba ki briew ki mad ia ka jingpang bun jait ha ka pyrthei, kynmaw ba u Blei hi um ju iehnoh ia u wei pa u wei u briew u pynkhiah pat ia ki na kata ka jingpang baroh. Kumta phi kiba mad ia kane ka jingpang ruh phim dei ban sheptieng lane duh jingkyrmen namar U Blei hi u la tip bha ia ka jingim jong phi ban ia kaba phi tip ma phi. Bun bah ki jingpang u la pynkhiah ha ka pyrthei naduh mynshwa haduh mynta.

Hynrei kaei kaba phi dei ban leh ka long bujli ia ka jingsheptieng jong phi da ka bor jong ka jingduwai, wat ym khuslai shaphang ka jingpang jong phi, ka jingkhuslai ka jong phi kan ym lah ban pynkhiah ia ka jingpang jong phi lymda phim ngeit bad shaniah ha U Blei u ba lah ban thaw bad u ba lah ban pynduh noh ia ki jingpang baroh. Kumta haba phi don ha jingthiah pang namar ka jingpang jong phi wat pynlut por ia lade ha ki jingjaw ummat bad ki jingsngewsih, hynrei sethpynlut por ia lade ha ka jingduwai kaba khlem da pud. Tang kita kiba dem diap ha jingduwai U Blei un pynkhiah ia ki. Kynmaw ba U Blei u la leh shisien ia ka kam bah ba nyngkong hapoh ka jylla jong ngi halor ka khlam, hadien ka jingkhlad noh i Dr. Sailo Ryntathiang U la pynkhiah lut ia baroh 12 ngut kiba pang Covid-19 bad kane baroh ka dei da ka jingngeit skhem jong ki ba pang baroh hi U Blei u sngew ia ka jingkyrpad jong ki. Bad ka jylla ka la long kaba jop shipor na kane ka khlam hynrei dei tad ynda la wan ki para doh para snam na bar ka sdang ban ioh jaka biang hynrei watla katta phi ruh phim dei ban duh jingkyrmen.

WAT SHEPTIENG U BLEI U LONG KA JINGKYRMEN JONG PHI:

Lada phi ong nga sheptieng.
U Blei u ong: To wat sheptieng namar nga long ryngkat bad phi, wat sngewma nga long U Blei jong phi: ngan pynshaitbor ia phi, ngan iarap ia phi. Isaiah 41:10

Lada phi ong nga sheptieng ia ka khlam Covid 19.
U Blei u ong: Men ym sheptieng ia kata ka jingtriem mynmiet….na ka jingiapkhlam ba iaid ha ka ba dum, Ha syndah jongme shihajar kin kyllon , bad shiphew hajar ha ki kti ka mon jong phi, hynrei kan ym wan ha jan jong phi. Salm 91:5-7

Lada phi ong balei U Blei u iehnoh ia nga hapdeng jingjynjar?
U Blei u ong: Ngan ym iehnoh khunswet ia phi : Ngan wan pat ha phi. Ioannis 14:18. Ngan ym iehnoh ia me da leilei, lymne ngan ym lyndet noh ia me da leilei. Hebru 13:5

Lada phi ong lano kane ka khlam kan jah?
U Blei u ong: Ha kata ka pyrthei phin ioh jynjar, hynrei to long shlur phi. Nga nga la jop ia kata ka pyrthei. Ioannis 16:33

Lada phi ong kumno haba la duwai U Blei um jubab eiei?
U Blei u ong: To ai ba ka jingiaishah jong phi kan paw ha ki briew baroh. U Trai u la jan. Phillipi 4:6

Lada phi ong nga la duh jingkyrmen shisha.
U Blei u ong: U Blei u long ka jingkmen un pyndap ia phi da ka jingkmen bad ka jingsuk kyrhai. Rome 15:13

Lada phi ong kata baroh ka bym lah ban long.
U Blei u ong: Da kti ki briew kata ka bym lah, hynrei da U Blei kiei kiei ki long kiba lah. Mathaios 19:26.

Kumta wat la phi long na kano kano ka kynhun niam phim dei ban sngewpher namar tang u wei U Blei u ba thaw ia nga bad ia phi. Kumta to ngeit phi ruh ha u ta U Blei u ba phi ju ngeit borabor bad u ba lah ban pynim ia phi.

Bad ia kiei kiei baroh kat kaba phi pan ha ka jingdwai da kaba ngeit, phin pdiang. Mathaios 21:22.

U Blei un kyrkhu ia phi kiba mad ia kane ka jingpang baroh. Amen