Lait noh ka Labour Ward, ka hospital NEIGRHIMS ka treikam kumba long man ka por

Shillong: Hadien ba ka la mih ka khubor, ba ka ka longkmie ba armet ka ioh jing pang ‘corona virus’, ki nong pyniaid ka hospital NEIGRHIMS ki la khang shwa shipor ia ka ‘Labour Ward’ kum shi bynta ban siat dawai bad ban pynkhuid ryngkat ban wad ia ki ba la ia kynduh ia ka longkmie ba armet ba thiah hapoh ka ‘Labor Ward’.

Ka kyrwoh napoh hospital NEIGRHIMS la batai ba ia ka longkmie la pynkit sha NEIGRHIMS hospital ha ka 9 tarik Jylliew 2020 hadien ba ka la don jing suh bad na ka liang ki bor hospital ki la eksamin ruh ia ka bad la lap ba ka don ka jing pang ‘corona virus’.

Kumban shu pynkynmaw u kurim jong kane longkmie ruh u don ia ka jing pang ‘Corona Virus’ bad ha ka 6 tarik Jylliew la pynkit ia u sha Civil Hospital na ka bynta ban ai jing sumar. Ka kyrwoh ka batai ruh ba u kurim u la wanphai na Delhi ha ka 30 tarik jymmang 2020 bad la ‘quanrantine’ ia u ha ‘MATI Quarantine Centre’ bad namar ba ka kaiphod ka pyni ‘Negative’ la pyllait noh ia u ban leh ‘quanrantine’ ha la ing.

Mynta ka sngi ki nong pyniaid ka hospital NEIGRIHMS ki la pynlong ruh iaka jing ialang na ka bynta ban iakren halor ki lad lynti ban teh lakam ia ka jing pur ka jing pang’corona virus’ hapoh ka hospital ne shabar ka Hospital.