Maham ban mih khlem deng Face Mask ha Nongpoh

Nongpoh:Ki nongkitkam ka Nongpoh Town Committee (NTC), lyngba u Bah C.B Syiem bad u Bah Rayonald Khar kamni, ki la kyrpad ia ki paitbah nongshong shnong ba kin deng ia ki Mask, haba ki mih sha surok ne sha ki Iew sha hat, khnang ba kin lait na ka jingshah shain kuna ha ki briew ka Ain.

 Ki nongialam ka NTC, ki la ong ba ka nongrim kaba la pyn long ia ki ba kin pyn mih ia katei ka jing kyrpad sha ki paidbah, ka dei hadien ba ki la ioh ia ka jingthoh na ki bor Distrik ka Ri Bhoi, kiba la pan ka jingtreilang halor ka jingiai leh pyrshah ki paidbah bad kata ka long ba kim ju deng ia ki Face Mask ha ka por ba ki mih surok ne leit sha ki Iew ki hat.

   Namarkata, halor katei ka nongrim, na ka liang ki nongkitkam ka NTC, ki la kyrpad ia ki paidbah ba kim dei ban leh pyrshah ia ka Ain, hynrei ki dei ban deng ia ki Face Mask, khnang ba kin lait na ka jingshah dain kuna ne ngat ha ki jingshah pynshitom katkum ki kyndon ain.
   Kitei ki nongialam ka NTC, ki la phah ruh ia ka kyrwoh, ba kin sa leh ia ka jingtalasi ia kito ki bym deng ia ki face mask bad lehse kan sa sdang noh shen, ha kaba lada ki lap kin sa aiti beit ha ki briew ka Ain. Lah ruh ban kdew hangne, ba dang shen ka District Magistrate ka Ri Bhoi, ka la pynjari da ka kyndon 144 CrPC kaba long kum ka jingmaham halor ka jingbym deng mask ki paidbah, ha kaba la pynskhem ruh da kaba bsuh da ki kyndon 188 CrPC, 195 CrPC/269 IPC bad kin sa shah dain kuna haduh T. 1000 lane ban shah patok haduh 6 Bnai.