Kwah plie biang ia ka Iewduh

Bah Monarch Shabong

Ka jing iakren ia ka jingplie biang ia ka Iewduh, ka la sngew kynrum kynram shi katdei, ha kaba wat ka sur jong U Chief Executive Member ka Khasi District Council (KHADC), kam shai satia haduh mynta bad lah ban kynmaw, ba ha ka 4tarik Jymmang 2020, U CEM, ula pynpaw shwa ia ka jing donkam ban plie noh ia ka Iewduh bad katei ka long hadien, ba ula ia kynduh bad ka kynhun ki nongshong iew, katba ha ka 26tarik Jymmang, ha ka jing ia kynduh bad ka Deputy Commissioner, East Khasi Hills, ka rai jong U CEM ka KHADC, ka long ban khang shwa ia ka Iewduh bad katei ka pyni, ba ka rai ka long kaba kynrum kynram.

Kam kut tang katta, hynrei ha ka Lah Sngi U Blei, U CEM, ula pynpaw, ba ka donkam ban sdang plie noh malu mala ia ka Iew bad katei ka pyni, ba ka jingmut jong u heh duh ka KHADC, kam skhem satia bad katei ka ailad ia ka sorkar, ban jyrwait shkor pynban. Na kaei kaba ngi iohi, ia ka jingplie ia ka iew ka hat ha Motphran, ha iew Mawlong, Paltan Bazaar, kiba don sbak hi ha syndah jong ka Iewduh, ka la pyni shai ba ka sorkar Jylla, kam salia, wat lada yn khang dam noh shirta ia ka Iewduh bad mynta lei ki nang iaid shakhmat ban nang pynheh ia ki iew shnong jongki, kumba la leh ha Upper Shillong, ha Lad Smit, ha Mawiong bad ha kiwei ki rud nong jong ka nongbah. Ka jing buhteng jong ka KHADC ban plie ia ka Iewduh, ngi la nang pyrkhat, ba ka thew ban weng noh ia ki nongshong wai (ha kaba kiba bun ki dei ki bar Jylla), na katei ka iew, namar ba ki nongshong wai, kin nym lah ban siew bai wai dukan, lada ka iai bteng ka jingkhang dukan; hynrei lada jia ba kam dei kumta, ka Iewduh, ka la dei ban plie lah shibnai tam mynshwa bad ia ki kyndon, la lah ban pynbeit, kumba plie ia ki dukan jong ki kharkaia ha Paltan Bazaar.

Ka sobjek, kaba jrong ban iakren, hynrei ngim tip, la ka Khasi District Council, ka la nang sngewthuh ne em ha kine ki sngi, ha kaba ha ka kyrteng jong ka khlam, ka sorkar Jylla, ka la nang klun ia shibun ki bor jong ka Council bad kawei na kitei, ka long ka jing iaid hi ka sorkar Jylla sha ki dorbar shnong ban iakhun ia ka corona, nangta ka jing pynrung kyrteng ia kiba bun ki dukan die jingdie, ha kaba la imat, kumba ka KHADC, kam don kti eiei ruh em.

Ha ki khyndiat sngi ba ladep, ngi iohi, ba U CEM, ula kren ba ki bar Jylla, ki dei ban pan jingbit na ka KHADC ha shwa ba kin rung, hynrei katei ruh, ka long tang ka jing mutdur, namar ba kat ka khyrdop ha 13mer, Byrnihat, ki dang ia phrung tuh, hynrei ka KHADC lei, ka ap ba kin leit iathuh hi, te ka bym lah long satia.