Da u Ex.Rev.K.Langrin, Seiñduli, West Khasi Hills District.
Nga la iohi ia ki kyndon ba la buh da ka sorkar na ka bynta kiba kwah leit jingiaseng ha ïingmane naduh ka 14.6.2020. Napdeng kito baroh ki don 3 tylli kiba ngam sngewdei. Kita ki long (1)Ym bit ban ktah ia ki kot bakhuid, kaba mut ia ka Bible, (2)ym bit ban ia rwai lang bad (3)ym bit ban duwai lang.
Hangne nga shu pynpaw ia ka jingsngew pyrshah jong nga marwei. Ngam tip kiwei ki sngew kumno? Ngam ong ba ki khristan bad kiwei kiwei ki niam kin ialeh pyrshah noh ia ka sorkar, namar baroh ngi dang pyndonkam ia ka pisa ba don ka dur Mahatma Gandhi. Kita ki bym kohnguh ia ki aiñ jong ka sorkar te ka la bha ia ki ban kyntait syndon ia ka pisa ba don ka dur jong ki riewkhraw. Nga pynrem ruh ia ki khristan ki bym kohnguh ia ka sorkar, kiba ju pynlong jingiaseng man ka sngi Sunday kiba ong, “Ka balang bad ka sorkar kim don jingiadei,” katba ha ka pisa ba ki lum jingainguh ka don ka dur u Mahatma Gandhi.
Na ka liang jong nga te ngam pat sngew don jingmut ban leit ïingmane namar kitei ki 3 tylli ki kyndon ba ka sorkar ka khang pyrshah. Ka sorkar Meghalaya ka dei ban sngewthuh ba lada khang ban pule Bible, ban rwai lang, ban duwai lang…kata kam dei ka jingiaseng. Namar ha ki jingiaseng jong ki khristan, kitei 3 tylli ba la khang da ka sorkar ki long kiba kongsan tam. Ki paidbah kim sngew don jingmyntoi ban shu leit ieng kum ki statue ha ïingmane khlem da iashim bynta ban rwai, ban duwai lang, ban pule Bible, ban iathuhkhana…Kane te ka long pynban tang kum ka drama. Khlem pep u ksuid ruh un iohlad ban rung ha ïingmane.
Te nga shu ai jingmut ia ka sorkar, khnang ban iada ia ka jingrung u ksuid ha ïingmane bad ban pynlong drama ia ki jingiaseng, hato kam dei mo ia ka sorkar ban khang shuwa mynta shipor arpor ban pynlong jingiaseng lang ha ïingmane? Nga sngew ba ka jingñiew kot bakhuid jong ka sorkar tang ia ka Bible heh ba buh ha ïingmane ka long kaba bakla, namar ki Bible rit ba ngi thep ha pla bad ki Bible ba ngi buh ha ïing ruh ki long kiba khuid.
Nga ai jingmut ruh ia ka sorkar, ba kan bha ne em ba ki paidbah kin shong shabar jong ka ïingmane, kin bud ia ka aiñ jong ka social distancing ryngkat da kaba deng mask, ne ba kin shu sngap na ïing ia ka jingrwai, jingduwai bad jingiathuhkhana lyngba ki tiar pynsawa (P.A.System). Ban leh ia kata yn shah tang 3 ne 4 ngut ban rung ha ïingmane. Nangta kata kaba ka sorkar ka la bthah ban shu tem da ki jingtem ba la record lypa ka iadei tang ha ki jaka sor. Ha nongkyndong pat yn leh kumno?
Ban pynkut ia kane ka jingthoh nga kwah ban buh ia ka sorkar da kine ki jingkylli:-
1)Bit ne em ba kiba leit jingiaseng ha ïingmane kin lum jingainguh?
2)Bit ne em ia ki pastor bad ki phadar ban leit rung ïingmane?
3)Long ne em ba ka sorkar kan revise biang ia kitei ki kyndon?
4)Long ne em ban pynbeit kyrpang ia ki nongkyndong?
5)Long ne em ban phah surprise visit da ki pulit ia kiba pynlong jingiaseng?
6)Long ne em ban pynshitom ia kiba leit ïingmane ki bym deng mask bad kiba shong khapngiah?
7)Long ne em ba ki pulit kin wan jingiaseng lang bad ki paidbah?
Phi don ban ong eiei?