Ki la don bun ki kynthei ha Assam, kiba la sdang ban mane blei ia u khniang corona bad ka jingngeit jongki, ka long ban pynjem mynsiem noh ia utei u khniang, uba la sar ia ka pyrthei baroh kawei. Ym tang ha Assam, hynrei la iathuh ba ki la don ruh ha Jharkhand, kiba la mane blei ia u khniang corona.
Ki don bun ki kynthei ha ki jaka jong ka Assam, kiba la pynlong ia ka jingmane blei ba kyrpang ia utei khniang, lane ba ki khot ‘Corona Maa’.
La iathuh ba ha Biswanath Chariali bad ha Darrang district, wat ha Guwahati ruh, ki don kiba la pynlong ia ka jinglehniam, ha ka jingsynran lang jong shibun ki shynrang bad katei ka jinglehniam, ka dei kaba la tip, kum ka ‘Corona Devi Puja’ bad la pynlong ha ki rud wah, lane ha trai jong ki dieng kiba heh.
La iathuh ba ki don ki kynthei ha Biswanath, kiba la pynlong ruh ka jingshah thngan, kum ka jing lehniam ia katei ka blei bad ki shim ba lada ka blei corona, ka sngewhun ia ka jing lehniam, kumta katei ka jingpang kan sa jah noh na sla pyrthei.
Ha ka taiew ba ladep, la iathuh ba ha ki bynta jong ka Jharkhand, ki don shibun ki kynthei kiba tyrwa da ki syntiew, ki ladoo bad ka um khuid sha katei ka khniang corona. Kitei ki kynthei, ki shong ha trai jong ki dieng bah bad ki lehniam ia ka blei corona.
Phi don ban ong eiei?