rDie lilam ki kur ia ki sniang, blang, masi ban siew T.6 lak sha ka AKKA Wan phai ar ngut, shah byrngem sa 6 ngut ki malik dewiong na Shahlang

Shillong,3 Risaw:
Na ka T.2 klur tyngka marwei ba ka kynhun lehnoh, ka la dawa na ki ba ha ing hasem jong ki ar-ngut ki malik kiba la shah rahbor na Shahlang; ki bahaing ha sem ki la lah ban pynmih pisa tang T. 6lak tyngka kaba mut T.3 lak marwei, bad ia kitei ki pisa ki la phah sha ka kynhun lehnoh kaba dang shu mih thymmai kaba la tip kum ka AKKA. Hadien ba la dep ban phah ia ka T.6 lak tyngka ki lehnoh ki la pyllait noh u bah Tender Nongbri bad ia u bah Edward Nongmin ki ar ngut ki malik dewiong kiba la shah rahbor ha ka miet 28 tarik mynta u bnai. Kitei ki ar-ngut ki la sah san miet lynter ha ktem jong kitei ki lehnoh.
La iathuh ba ki bahaiang hasem jong kitei ki ar-ngut ki don hapdeng ka jingeh kaba khraw ban pynmih ia katei ka pisa kaba la dawa da ki lehnoh namarba ki don hapdeng ka jingkordit pisa namarba ki bai dewiong jong ki ki dang sahkut lut. Hynrei la pyrshang ban pynmih pisa jubor justi da kaba lum ia ka Dorbar Kur jong ki.
La iathuh ruh ba ki bahaing hasem ki la pynmih ia katei ka T.6 lak tyngka da kaba die lilam ia baroh ki sniang, ki blang, ki masi jong ki bad kiwei pat ki jingdon jingem ba ki don, hadien ba ki la pynbiang ia katei ka pisa la wan buh ia ki da kitei hi ki kynhun lehnoh ha ki rud shnong ka Shahlang. U Bah Tender u la poi ing ha ka por 6:15 janmiet katba u bah Edward pat u la poi ing ha ka por 6:30 janmiet bad ka por poi ing jong ki ka iapher tang 15 minit.
Kitei ki ar ngut ki malik ki la poi ing da kaba suk kaba sain, bad kam shym la don kano kano ka dak mynsaw ha ki met jong ki, hynrei ka dur khmat bad ka met jong ki ka shu ring rai khoh namarba ba kam biang ka bam, iathuh ki tyllong khubor.
Shuh shuh ka tyllong khubor ka la iathuh ba mynhynnin ka miet sa 6 ngut ki malik dewiong kiba dei ki Khasi kiba don ha Shahlang ki la shah byrngem ha kitei ki juh ki kynhun lehnoh , kaba ki la kam ba ka dei ka AKKA, bad ha ka jingiakren phone kim lah bat ia ka kyrteng pura jong ka AKKA tangbah ki shu ioh kem ba ka sdang na Achik bad ka kut ha ka kyntien Army. Kitei ki lehnoh ki la byrngem ia ki hynriew ba lada kim pynpoi ia ka T.2 klur tyngka marwei kin leh da ka kam. La iathuh ba ka jingbyrngem jong kitei ki lehnoh kam dei da ka shithi hynrei ka dei da ka jingiakren lyngba ka mobile, ha ka phone la iathuh ba la ong ba lada ki wan pynpoi ia ka pisa kin lait na ka jingshah rahbor.