Ka jingpang coronavirus, ka la nang kiew stet bha ha India, ha kaba ha ki 24 kynta ba ladep, ki don 9,971 ngut kiba ioh ia katei ka jingpang bad sa 287 ngut kiba iap bad baroh kiba ioh pang khlam corona, ki la poi mynta sha ka 2,46,628. Na kitei ki kynthup ia 1,20,406 ngut kiba dang shah sumar bad sa 1,19,293 ngut kiba la koit noh bad sa 6,929ngut kiba iap.
Ki saw tylli ki nongbah, kiba heh ka India, kiba kynthup ia ka Delhi, Mumbai, Kolkata bad ka Chennai, ki don ia mar shiteng kiba ioh pang covid 19 bad tang ha ki 24 kynta ba ladep, kitei ki nongbah, ki don haduh 10hajar ngut kiba ioh pang.
Hynnin ka sngi, ka tnat ka koit ka khiah ka sorkar India, ka ai jingkhein ia 2,36,657 kiba ioh pang, ha kaba ki don 9,887 ngut kiba dang shu ioh pang ha ki 24 kynta ba ladep jong ka sngi saitjain bad kiba iap, ki long 294 kaba poi sha ka 6,642.
Ka India, mynta ka hap ha ka thup kaba san jong ki ri, kiba bun tam kiba ioh pang corona bad kitei ki kynthup ia ka US, Brazil, Russia bad ka UK. Ha ka jingdon kiba iap, ka India, ka don ha ka thep jong ki 12 tylli ki Ri, jong ka jingbun kiba iap, katba ka jingdon bun kiba la koit na ka jingpang, ka India, ka dei na shiphew tylli ki Ri, kiba don bun ki nongpang kiba la koit noh.
Phi don ban ong eiei?