Na ka daw jong ka jingwan ka khlam coronavirus, ka wan ka mat pyrkhat ha kine ki sngi, ban pynlong noh da ka jing ia thep vote online nangne shakhmat bad katei ka long ba ha ki elekshon, ki ban wan, yn shu thep vote beit na iing lane na kano kano ka jaka ba u briew u don, khlem da donkam shuh ban leit ieng lain sha ki jaka thep vote.
U Satya Pal Jain, uba dei U Additional Solicitor General bad nangta sa U Sushil Kumar Modi, deputy Chief Minister ka Bihar, ki ai jingmut ba katei ka rukom pyrkhat thymmai, ka dei ban iaid noh mynta u snem hi bad ka daw ka long namar ba ki elekshon, ki la nang wan shakhmat, katba ka jing ia jngai para briew ruh, ka long kaba donkam eh ha ka leit ka wan bad ka jing ia dei kam ba man ka sngi.
Katei kajuh ka mat pyrkhat, ka wan ruh ha United States, namar ba ka elekshon President, kan long ha U Naiwieng 2020.
Ki don shibun kiba ju kyrshan ia ka jing thep vote da ki Electronic Voting Machine (EMs), kiba iahap ia katei ka mat bad U Shashi Tharoor, u nongialam ka seng Congress, u pynpaw ia ka jingsngew iahap jingmut jongu, ia ka jingthep vote online.
U Shashi Tharoor, u pynpaw, ba ha kine ki sngi, la pyndonkam online ha kaba thied jingthied, haba peit ia ka koit ka khiah u briew, ha kaba buh pisa, hynrei u pynsngew pat ba ka don tang kawei ka jingeh, ka long ba ka sorkar, kaba don ha ka bor, ka lah ban shim kabu, ban leh tuh ia ki vote bad ka dei tang katei ka mat, kaba dei ban wan ia ki lad ban khang ia ka hacking, ula ong shuh shuh.
Kane ka rukom thep vote, ka la ju long kham mynshwa ruh, lyngba ki postal ballot, tangba katei ka trei kam, tang ia ki katto katne ki nongthep vote kum ki shipai, ki pulit bad ki nongshong shnong ba rangbah, ki bym ioh lad ban leit thep vote dalade hi.
Na ka liang jong ka Election Commission of India, ka la nang iaid shakhmat ban ia mit jingmut halor ka rukom thep vote, kaba ki khot Electronically Transmitted Postal Ballot System (ETPBS), lane kaba ju leh ia kito ki nongthep vote kiba don sha kiwei ki jaka, tangba kiba don ban pyndep ia la ka kamram bad ia ki vote jongki, la ju phah mar mar da ka dak.
Phi don ban ong eiei?