rJubor ka jingduna Doktor ha ka jylla Tang 3 ngut ki dotor, ba treh ia ka tulop heh ka sorkar

Shillong, 3 Risaw:
Ka jingduna doktor ha ka jylla Megha laya ka jur bha khamtam sha ki jaka nongkyndong namar ba bun na ki doktor kim treh ban leit sha ki jaka nongkyndong namar ba bun ki jingeh.
Ha ka jingiakren bad u ophisar ka tnad ka koit ka khiah, u la iathuh ba ki don tang lai ngut ki doktor kiba la treh ia ka jingtyrwa ka sorkar ban leit sha jaka nongkyndong bad kine baroh ki dei ha Garo Hills. Ka sorkar dang shen, ka la tyrwa da ka tulop heh kaba T. 2 lak shi bnai na ka bynta kito ki doktor kiba treh ban leit sha ki jaka nongkyndong kum kawei na ki lad ban khring ia ki doktor ban leit trei sha ki jaka nong kyndong.
“Wat la ngi la tyrwa ia ka tulop kaba heh haduh T.2 lak shi bnai na ka bynta ki doktor kiban leit sha nongkyndong hynrei ki don lai ngut kiba la treh bad kane ka long tang ha Garo Hills”, la ong u ophisar jong ka tnad ka koit ka khiah.
U la ong ba katkum ka jingpule bniah jong ka International Corporation Study for Medical College ka jingdon jong ki doktor ha Meghalaya ka long 0.2 na bynta shi hajar ngut kaba mut uwei u doktor u hap ban sumar haduh lai hajar ngut tam ki briew katkum ka jingdon ki nongshong shnong.
Haba iakren bad u heh uba dei peit ia ka tnad ka koit ka khiah ha ka jylla, la iathuh ba ka jylla ka don 801 ngut ki doktor bad napdeng kine tang 135 ngut ki dei ki doktor specialist kiba don ha ki hospital bapher bapher.
La iathuh ba ka daw lehse ba ka ki doktor kim treh ban leit sha ki jaka nongkyndong ka dei namar ba ki ia kynduh jingeh ha ka lynti synkein, ka thaih ka dem bad kiwei kiwei ki lad kiba pynlong ia ki ban kynran dien ban leit sha ki jaka nongkyndong.
U la iathuh ba katkum ka rekod ba la ioh napdeng ki nongshong shnong ha kane ka jylla ba don kumba 29 lak tam katkum ka khanasumari 2011, 65 percent ki nongshong shnong ki jied ban leit shah sumar ha ki jaka sorkar khamtam ha nongkyndong.
Ka daw ka long ba ki kompeni ne ki kynhun shimet kim treh ban leit buh ha ki jaka nongkyndong namar ba kim da iohnong than kumba long ha ki jaka sor.
Kane ka la pynlong ia ki ban pynleit jingmut beit ban plie ban buh jaka sumar beit tang ha ki jaka sor namar tang ban ioh jingmyntoi.