8 haduh 13 Jylliew, yn plie ia ki Iew dielang ha Anjalee bad Iew Mawlong

Shillong:U myntri ka tnat ka rep ka riang u bah Banteidor Lyngdoh, myn hynnin ka sngi, u la ong ba ka sorkar ka la rai ban plie ia ki Iew dielang, na ka bynta ki nongrep ban ioh die ia ki mar jong ki naduh 8 tarik haduh 13 tarik jylliew 2020 hapoh jaka ieng kali Anjalee bad ha Iew Mawlonghat.

“Ka jing rai ka sorkar ban plie ia ka Iew Dielang hapoh Anjalee bad ha Iew Mawlonghat naduh 8 tarik haduh 13 tarik ka long kum shi bynta ban ailad ia ki nongrep ka jylla ban ioh die ia ki mar jong ki” la bynrap u bah Banteidor Lyngdoh.
Na ka liang u bah Banteidor, u la ong ba ka jing shah ban plie iaki Iew dielang kadei namar jan baroh ki mar rep ki long ki mar ban pyut kloi bad lada ki nongrep kim ioh ban die noh iaki mar rep jong ki, kan long ka jing duhnong kaba khraw ia ki nongrep ka jylla. U bah Banteidor Lyngdoh u la kyntu ia ki nongrep bad ki paidbah khamtam ki nongkhaii kiba wan thied mar rep ba kidei ban bud ryntih ia ki kyndon ka tnat ka koit ka khiah khamtam lei ha ka jing ia shong jngai na kiwei pat, kum shi bynta ban tehlakam iaka jing pur ka jing pang corona virus.
Nalor kane u myntri ka tnat ka rep ka jylla u bah Banteidor Lyngdoh u la kyntu ruh ia ki pulit bad ki bor district ba kim dei ban pynwit lane dain kuna pathar ia ki nongrep kiba wan die ia ki mar jong ki khamtam kito kiba wan na ki thain kyndong ka jylla.