Jur kiba kwah dud, tang 8 hajar litar shi sngi

Shillong, 29 Nailar:
Ka jingdawa dud masi ka jur bha katba ka jingpynmih ia ka dud ka long kaba duna bha ha kane ka jylla.
Haba iakren bad u Director ka tnad Veterinary u Dr JS Jyrwa u la iathuh ba palat phra hajar litar shi sngi wanrah dud masi ki nongrep sha ka sorkar hynrei ka jingdawa ka dang jur bha.
U la iathuh ba ia ka dud masi la ioh tang na ki nongrep na ka thain Upper Shillong kum na Umlyngka, Laimer, Bad kiwei kiwei ki jaka ba marjan bad na ki katto katne na ka thain Ri Bhoi.
Ia ki dud la wanrah da ki nongrep sha kane ka tnad bad la shimti bad la thied da kawei ka agency jong ka sorkar ka District Milk Procurement and Marketing Agency ban die sha Iew.
U Dr Jyrwa u la ong ba ka agency ka thied ia ka dud na ki nongrep ha ka dor T.34 shi kilo bad hadien ba la dep song ia ki dud ka la die pat sha iew ha ka dor T.38 shi kilo.
“Ki don kumba 10 tylli ki society na ka thain Upper Shillong bad kumba 2 tylli na ka thain Ri Bhoi District kiba die sha katei ka Agency”, la ong u Dr Jyrwa bad u la bynrap ba ia ka dud la leit lum hi da ki briew na katei ka tnad Veterinary man ka step na kitei ki jaka.