T. 30 lak, pynlut shna pandal puja ha Jail Road

Shillong, 28 Nailur:
Ka jingmang ban pynlut na ka bynta ban rakhe ia ka puja mynta u snem ka la kiew arshah na ka bynta ka Pandal ha Jail Road, Shillong bad ia kane la iathuh da u secretary ka Jail Road Centenary Celebrations Committee u Shyamal Dey.
U Dey u la ong ba ka Jail Road Puja Committee (JPC) kaba la thaw ha u snem 1914 da u Bipin Behari Sen, Prasan na Kumar Dutta bad u Avinesh Choudhury kum ki dkhot.
“Ngi la rai ban pynlut T. 30 lak ha kane ka snem. Ngi pynlut T. 16 lak na ka bynta ban pyn itynnad bad pynmeh ding ha ka pandal”, la ong u Dey.
U la ong ba ia kane ka jaka ha Jail Road la aiti sngewbha da ka sorkar phareng ha u snem 1914, sha ka Jail Road Society Hall.
“Ka jaka ialum puja kaba heh tam bad kaba khadduh ka ju long ha borabor ha Jail Road namar ba ngi tip ba kan long kaba biang tam. Ngi sngew kmen ban lah ban bat ia ka jinglong kaba kyrpang watla ngi don shibun ki jingeh” la ong u Dey.
U secretary ka JRCDPC u la ong ba mynta u snem la pynheh ia ka mang tyngka ban pynlut namar ba ka dei ruh ka snem ba dap shi spah snem kane ka puja naduh ba la aiti ka sorkar phareng ia katei ka jaka.
Katba u president ka CPC u Naba Bhattacharjee u la iathuh ba kane ka jaka ka don ka khana kaba kyrpang namar ba dei hangne ba u Subhash Chandra Bose u la wan jngoh ha u snem 1937 ban thung ia ka sorkar jong u Gopinath Bordoloi.
Ka jingleh kmen puja mynta u snem ka la sdang ha kane ka sngi Saitjain ha katei ka pandal ha Jail Road ba la pynlong da ka Central Puja Committee (CPC).
Ha kajuh ka por u Lat ka jylla u Dr KK Paul haba kren ha kane ka sngi Saitjain u la ong ba “ka Durga Puja ha Meghalaya ka kdew ia ka jingkmen jong baroh ki jaidbynriew lyngba ka jingiaim lang ha ka imlang sahlang kaban pynkhlain ia ka jingiadei hapdeng baroh ki jait niam”.
U Dr Paul u la ong ba ka jinglong jingialong kawei ka dei ka jingialum lang bad kane ka pyni ia ka jingangnud jong ki paidbah ban bat ia ka jinglaitluid bad ka jingsuk. Ka long ruh ban lait na ki jingsniew na ka mynsiem u bymman. La ioh ruh ia ka jingkren na kiwei pat ki nongialam na ki kynhun niam bapher bapher ha kane ka sngi.