Ym donkam pass shuh ki kali riew shimet bad ki kali kamai, hynrei kin iaid kat kum u odd bad even number

Shillong: Ka sorkar mynta ka sngi ka la shah ban iaid ia ki kali kamai bad ki kali riew shimet ha baroh kawei ka jylla, kynthup ha ki jaka ka sor Shillong, hynrei kine ki kali kin hap ban iaid tang 50% shisngi, kata shisngi kin iaid ki kali kiba dei ki Odd number bad shisngi yn iaid ki kali ki ba dei ki Even number.

Haba iakren bad ki lad pathai khubor, na ka liang u bah Prestone Tynsong, symbud myntri rangbah ka jylla, u la iathuh ba ha ka jylla, ki kali kamai bad ki kali riew shimet ki la lah ban iaid 50% shisngi bad kin iaid Odd bad Even number.

U bah Prestone u la iathuh ba kiwei pat ki jingpynsur; na ka liang ka sorkar jylla ki long ba lashah ia ka jingiarung iamih na kawei ka district sha kawei ka district (inter district movement) hynrei ka sorkar jylla kam pat shah ia ka iarung ia mih na kawei ka jylla sha kawei pat (inter-state Movement).

U la iathuh ruh ba ka sorkar jylla, ka la shah ban plie sa ia kiwei pat ki dukan ha baroh kawei ka jylla, lait noh tang ki dukan khapshniuh (barber/saloon shop) bad ki dukan beauty parlour kan ym pat shah ban plie.U la iathuh ba ha kaba iadei bad ki dukan ha iewduh, yn ym pat shah ban plie.

U la iathuh ruh ba ka sorkar jylla kan ym pat shah ban plie ia ki dukan sha bad ja ki ba don ha shi lynter jong ki surok bah (national highway).