U Phadar Khyllah Sngi Uba Kwah Ban Mih Tdong

Ha ka 28 tarik u Jymmang, 2020 u Phadar Albert Thyrniang ula thoh īa kawei ka article ha ka kotkhubor Shillong Times kaba ula aikyrteng ka “Reject fanaticism in any form.” Kaba mut, ‘Kyntait īa ka jingleh shongshit khlehbiej ne ka jingleh shongshit niam kaba long ha kano kano ka rukom ruh.’ Ha katei ka article, utei u Phadar jong ka Nongstoiñ Diocese ula pynlong sohpdung (target) īa i Bah Adelbert Nongrum, MLA jong ka Shillong North Constituency da kaba ula kynnoh dusmon hana ba i Bah Adelbert ila leh ‘fanatic’ ne shitniam hapoh Meghalaya Legislative Assembly. Utei u phadar khyllah sngi jong ka ‘niam democracy’ ula pynrem tyngeh tyngeh īa i Bah Adelbert bad uda banjur ruh hana ba ngi dei ban kyntait īa-i ha kajuh ka rukom kumba ngi dei ban kyntait īa ka jingshongshit niam ne īa ka jingshongshit politics ne īa ka jingshongshit kam-lehnoh. Haba peit khlem da pynshong nongrim bha, sngew kumba utei u phadar khyllah sngi ula kren īa ka badei. Hynrei hato utip īa ka jinglong bashisha jong i Bah Adelbert ba i long u briew uba kumno? Kumno u lah ban pynīasyrīiem īa ka jingsngew donkam Blei jong i Bah Adelbert bad ki kam leh shitniam (fanaticism), ki kam lehnoh (extremism), ki thma (war) bad ki jingīaumsnam (strife) bad kiwei kiwei? U la ong ruh hana ba i Bah Adelbert ila leh stunt? Hato ma-u pat u khlem stunt haba ka article jong-u hi kala buh jingeh lypa īangi ba ngin long kiba shitrhem hala ka Niam lajong? Kadei ka bih democracy bashyrkhei ban pynblemblem ne ban pynīap suki noh īa ka Jingngeit Niam Kristan jongngi. Khlempep na kadaw jong kane kin sa dang mih shuhshuh shibun bah ki briew kiban īaid tyrkhong khlem Blei.

Utei u phadar ula ak ‘over smart’ palat. Ula pynīaryngkat īa ka jingshitrhem hala ka Niam lajong bad ka jingshongshit niam kaba leit thombor īa kiwei. Lah ban sngewthuh īa kane na ki kyntien kiba u lathoh ha ka article jong-u, u ong: “Clearly religious zeal is a major cause of strife in the world today.” Toi udei ban shah sympat tyngeh ha u Blei. Utei u Lyngdoh Niam ula shu kahait dusmon kum u ksew lamwir tang namarba u khulom jong-u ulong uba nep kum u thylliej jong u ‘sein cobra balongbih. Kane lehse kalah ban dei namarba um hun shuh ban īoh burom tang na ka Niam ne Balang lajong. U kwah nam kwah burom sa na ka Pop Culture. Haba īalade ruh udei u Lyngdoh Niam, kumno pat u īasaid (advocates) īa ka jingbymdon niam (secularism, religionlessness), kaba mut ruh ka lynti sha ka jingbymdon Blei (an anticipation towards Godlessness)? Balei un leh kumne lada udei u Phadar uba biang khlieh? Hato ruh ymdei ba u pyndonkam īa ka Niam Kristan bad ka Balang Kristan tang kum ka lad ka lynti ba un īoh ban pynurlong īa ki jingthmu baarsap lajong (isn’t he using the Church and Christianity only as a hypocritical mean to his hypocritical end)?

Toi ha ka jingshisha i Bah Adelbert i khlem leh ‘fanatic’ eiei ruh em ha kato kasngi (22 tarik u Jymmang, 2020) ha kaba kala don ka jingīakren bakyrpang hapoh Assembly halor ka Khlam COVID-19. Ban ong īano īano ba ki leh ‘fanatic’ kan mut ba kileh shongshit khlehbiej ne leh shitniam khang da ka jingthmu ban leit pynbor īano īano ba kin pdiang jubor noh īa ka niam ne ka jingngeit jong kita kiba leh fanatic. Hynrei i Bah Adelbert i khlem pynbor īano īano ruh ba kin ngeit jubor noh ha ka Jingngeit ne ka Niam jong-i, bad kaei kaba lajia pyrshah īa-i ha kato kasngi ha Assembly, kalong namarba kadei ka niam Democracy hi kadei kaba don jingdkoh (insufficient). Katta ruh ki ong hana “Democratic, Pluralism.” Pynban utei u phadar khyllah sngi ula kynnoh dusmon īa i Bah Adelbert hana ba ila leh fanatic bad u klet pat īalade ba ma-u leilei ha kajuh kapor u leh ‘political fanatic’ bad ‘democracy fanatic,’ wat haba udei u Lyngdoh Niam. Hato donhok tang kito kiba leh ‘democracy fanatics’ seh ba kin kren mon īa kiwei? Hato ka kam leh ‘democracy fanatic’ ruh kam dei kaba long ‘extreme’ ne ‘radical’ bad kumta maka ruh kadei kaba long be-aiñ? Hato kim ju ong “too much of anything is bad”? Hato utei u phadar khyllah sngi ruh uba īohi tang īa ka lyngkdong jong kiwei umdei uba leh ‘democracy fanatic’ bad uba leh ‘politics radical’ namarba u īasiad democracy bad politics, wat haba udei u Lyngdoh Niam? Kumta, lada ka aiñ kam pynrem ne kam leh eiei pyrshah īa kito kiba leh fanatic ne radical, la kin dei ki ‘democracy fanatics’ ne ‘politics radicals’ ne kiwei kiwei, kan mut ba ka aiñ hi kadei kaba īashah shiliang bad ba kalong kaba matlah (Andha Kanoon). Kaba mut ba utei u phadar khyllah sngi ruh udei ban shah pynshitom ha ka aiñ na kadaw ki kam leh ‘political and democracy fanatic.’ Udei ruh ba shah kyntait (reject) kumba u lathoh ha ka article jong-u “Reject fanaticism in any form!” Ka pynlong ruh ba ngan kylli: hato utei u phadar khyllah sngi udei u “missionary of Love, Faith and Hope?” Nga te nga ong ba udei u missionary of Politics, Demon-cracy and SCAT-SATAN (Sc and Tech-Science and Technology are Notorious)!
Kalong kaba sngewksuid ban īohi ba da u phadar uba dei ban pynpaw īalade ba udon īa ka jingstad Theology bajanai bad ba udei ruh ban long uba riewblei, hynrei u pynpaw pynban īalade ba udei u democracy fanatic ne u ‘riewshit niam-democracy. Lada baroh baroh ki phadar ki bud īa ki dienjat jong utei u phadar Albert Thyrniang, mano pat ban dang sharai hok shuh īa ka Niam Kristan? Na kaei kaba ngi ladep īohi ha ka jingim kalong ba katba ki briew ki dang stad, katta ki dang kylla mrad. Kumno ki riewstad ki kylla mrad, kalong namarba ki leh bad ki īasaid īa kiei kiei kiba long palat pud bad khyllah kiba bunsien ki wanrah jingmynsaw ne jingsniew (repercussion) kylla īa ka pyrthei. Hato ki briew kiba kum kine kim dei ki extremists? Kane ka jinglong mrad kaba wan na ka jingstad palat jong ki briew kala ktah īa utei u phadar Albert Thyrniang ruh. Une u phadar riewstad jong ine i Jaitbynriew iba rit shidana, hynrei iba dap tang da ki nongpynjot nongpyntlot suda ha baroh ki liang pat, ula thoh īa katei ka article tang ban shohdab īa u para Kristan lajong bad khamtam īa ka Niam Kristan. Kaei kaba nga shem ha katei ka article jong utei u phadar kalong ba ula buh īa ka Niam ha ka kyrdan kaba poh ne kaba pynsngew long kamkai (wat haba īalade ruh udei u Lyngdoh Niam) bad ula pynksan borbah pat īa bun kiei kiei kum īa ka politics bad īa ka democracy; bad ula kren jem-mynsiem pat īa ki riewlehsang shynrang-kynthei ne ki LGBT. Hato utei u phadar udon jingīadei eiei bad ki LGBT harieh harieh, kumba kala jia īa kiwei kiwei ki phadar jong kiwei kiwei ki ri? Kumba la ong, utei u phadar u kwah palat ban pynpawnam īalade ha ka Pop Culture (Popularity Culture), hynrei um pyrkhat pat ba da kaba u pynhiar kyrdan īa ka Niam u dang pynmynsaw shuhshuh īa ka Niam Kristan hi kaba la mynsaw lypa na bun kiei kiei, kum ka jingshah krensih Niam ha ki Smat Bible bapher bapher bad kumta terter.
Lehse ngan jin da la pyrto ban da kadei ba īa katei ka article “Reject Fanaticism in any form” lathoh da uno uno u riewpaidbah. Hynrei namarba ka mih na u Lyngdoh Niam ka pynmong īa ka mynsiem jongnga kum u Kristan, namar kum u Kristan nga sngewthuh shai bha īa ka jingthmu jong u Blei balei Ula wanrah īa ka Niam Kristan sha ka pyrthei. Kadei ka jingshisha ruh ba baroh ki jait niam ha ka pyrthei kidei ki niam thaw-briew suda naduh ki niam Protestant balaiphewjait haduh ka niam Hindu, Muslim, Buddhist bad kumta terter. Ngim dei ban shah thok bad ban thok halor jong kane ka jingshisha! Dei tang ka Niam Kristan hi marwei kaba la wanrah da u Blei sha ka pyrthei, da ka jingthmu ban pynim (redeem) īa ki briew na ka pop bad ban pyllait īa ka pyrthei na ka jingtim (curse). Ñiuma, kane kam dei ka jingpynbor īa kito kibym ngeit ha u Trai Jisu Krist ba udei u Blei. Hynrei ngan kylli hangne, hato u Phadar Albert Thyrniang um sngew tikna (convince) ban ngeit ba īa ka Niam Kristan la sdang ne seng da u Blei? Ban kumta te, kan kham bha īa-u ba un wad noh da ka shyiengkrung, kumba leh u phadar Martin Luther, khnang ba ki jingmut jingpyrkhat ba kie be-rong jong-u kin kham ih-rong shuhshuh.
Ha katei ka article utei u Phadar Albert Thyrniang ula thoh bun kiei kiei kiba pynshaīong ngaiñ, īa kiba ngam lah ban sot lut hangne. Ban sot biang sa katto katne īa ki jingthoh jong-u, ula thoh, “On May 22 last, KHNAM MLA Adelbert Nongrum did something silly. He knelt down, read Bible verses and prayed in the Legislative Assembly.” Kaba mut: ha kato ka 22 tarik u Jymmang, u MLA ka KHNAM u Adelbert Nongrum ula leh īa kaei kaei kaba longbiej. Ula demkhohsiew, u pule īa ki dkhot Bible bad ula duwai hapoh Īiengdorbar Thaw-ain. Hato kine ki kyntien kidei kiba ngi khmihlynti ba kin mih na Phadar ne u Lyngdoh Niam? Hato u ksuid um īohsngew bad um īohi īa kane ka jingpynīasaid bajubor (strong endorsement) jong u Phadar Albert Thyrniang ba hapoh Īiengdorbar Thaw-aiñ ymdon jaka īa u Blei? Kan jia aīu īangi lada baroh ki MLA ha kane ka Jylla kidei kibym ngeit Blei ne ki atheists? Khlempep ngin īoh tang da ki aiñ ksuid suda. Namar ha ka jabieng kabym don īa ka jingngeit Blei, u ksuidtan u ju īohlad bha ban pynlong īaka kum ka factory ne ka laboratory bashyrkhei jong-u. Hato u phadar Albert Thyrniang udei u nongap langbrot ne udei u suri kup snieh langbrot uba bam hi īa ki langbrot? Haba kumta, kaei ka daw kaba pynkwah īa-u ban long Lyngdoh Niam, ban pynrem hi īa ka Niam Kristan?
Nangta ula thoh ruh, “Nongrum may be convinced of his faith but the Assembly is not the venue to manifest and preach his faith. It is a temple of democracy and secularism. It is an institution to uphold the constitution and defend the rights of all religion.” Kaba mut: u Nongrum ulah ban sngewskhem īala ka jingngeit hynrei ka Assembly kam dei ka jaka ban pynpaw bad ban īalap īa ka jingngeit jong-u. Kadei ka temple jong ka jingsynshar paidbah (democracy) bad jong ka jingngeit bymdon niam (secularism). Kadei īieng-nongrim ban kyrshan bad ban īada īa ki hok jong baroh ki niam. Hangne u la īasaid kum u political expert, tangba kala pynpaw shai pat ba u phadar Albert Thyrniang u shun īap ban īohi īa u Blei ba U leit rung hapoh kane ka Legislative Assembly jongngi. Kane ka pynpaw īa ka jinglong bakynsha jong utei u phadar ne u riewniam. Hynrei lada u ong “defend the rights of all religions,” balei pat i MLA jong ka Shillong North i shahkheiñ dewthala (expunge) ha u speaker? Hato ymdei ba ka democracy kalong kaba don jingdkoh (insufficiency) kumba nga la ong? Lah ban pynbiang pynbeit īa kane lada ki Nongmihkhmat jongngi kilong kiba biang ka jingsngewthuh (competent). Ka jingkylli ka mih ruh: Hato ka Democracy ka wan na shabar jong u Blei? Lada ka long kumta, hato kane kam mut ba ka Democracy kawan na u ksuid? Dei na kata kadaw imat ba ka Democracy ka sa kylla sniew haduh katne katne. Nangta, wat haba ki ong ba ka democracy ka ai īa ka jinglaitluid niam, hynrei ki shu leh shortcut pat da kaba shu kheiñ dewthala (expunge) īa u MLA uba pule Bible bad duwai.
Īa Phadar Albert Thyrniang ladei ban ong noh da u lyngdoh jong ka Demon-cracy, ymdei u Lyngdoh jong ka Christianity. Nga īaroh īa ka jingkhraw jingnang-jingtip jong u phadar Thyrniang, hynrei nga kyntait īa-u namarba udei u Lyngdoh bymbiang khlieh (I appreciate Fr. Thyrniang’s extensive knowledge, but I denounce him for being a crazy priest) Nga shaīong shangit ngaiñ ban pyrkhat balei uwei na ki class mate jongnga u kwah ban mih tdong bad ban mih reng!

U Phadar Demon-crazy

• Ko Albert Thyrniang Rangblang!
  Balei me kwah mih reng?
  Balei me kwah mih tdong?
  Balei me lyngkot jingmut kum ka rynīeng?
  Balei me stad kat ban da long mrad?
  Balei me klet īa ka saiñdur la u Kynrad?
  Me la pass īa ka Philosophy,
  Me la pass ruh īa ka Theology,
  Balei pat me īasaid democracy?
  Hato men pashait kylla īala ka Niam da ka umpi?
• Ko SDB, ‘Son of Don Bosco!’
  Me long Lyngdoh nabynta kaei ne īano?
  Balei me pynlong Lyngdoh Niam īalade-
  Ban īasaid Democracy ne ban īasaid Theocracy?
  Hato me ju duwai īa ka jingduwai “Ko Kpa jongngi?”
  Me sngewthuh kumno da kane-
  Ka Hima u Blei ‘Theocracy’ ne ka hima u ksuid ‘Demon-cracy?’
  Īathuh balei me kwah ban long Lyngdoh niam,
  Hato dei ba me thait ne shem shitom ban īoh kam?
  Ne, hato me kwah ban sliah kylla īa ka Niam?
• Ko Phadar Albert Thyrniang!
  Pynshai noh kdar biang-pa-biang:
  Ha ka liang jongno me īeng-
  Ha ka liang u Blei ne ha ka liang uba mih reng?
  Pynpaw noh īa ka jingthmu jongme keiñ,
  Hakhmat u Blei ruh men ai ka jingkheiñ,
  Ba me dei u nongap langbrot ne u suri kup snieh langbrot,
  Ba me dei u nongpynjot ne uba ri uba tyrsat;
  Ka Democracy bad ka Theocracy kilong marpyrshah,
  Ha ka liang jongno me īengrangbah, kum u Lyngdoh?
• Ko Reverend Albert Thyrniang,
  Me dei uba stad kum ka ñiangbading!
  Bad u khulom jongme artad u khlaiñbor,
  U khlaiñbor ban pynkhlaiñbor, u khlaiñbor ban pyntlotbor;
  U pynkhlaiñ īa ka Democracy bad u pyntlot īa ka Theocracy,
  Hato me la pule shida mynsiem īa ka Theology?
  Hato īa ka Balang jongme lathaw da kaei mo bah?
  Hato u Jisu Udei u democrat, kumno me sngewthuh?
  Democracy kadei īa ka doh, Theocracy īa ka mynsiem!
  Kum u Lyngdoh īa kaei me thung syiem?
• Bah Francis Syiemlieh