Nang kiew ka khlam coronavirus ha Nagaland, Assam, poi sha ka 1.82lak ha India

Kohima: Sa hynniew ngut, ki don kiba dang ioh pang Covid 19 ha Nagaland bad mynta, kiba ioh ia katei ka jingpang, ki la poi baroh sha ka 43 ngut.

Na kitei ki hynniew ngut, ki kynthup ia 4 ngut na Kohima bad 3 ngut na Dimapur bad na kitei ki don 4ngut ki kynthei bad 3 ngut ki shynrang.

Ka jingdon kiba pang ha Assam, ka la poi sha ka 1,216 ngut, da ka jingdon sa 31 ngut kiba ioh pang ha ka miet jong ka Sngi Saitjain.

U Himanta Biswa Sarma, myntri ka koit ka khiah ka Assam, u iathuh ba 11 ngut na kitei, ki dei kiba wan da ka liengsuin, 11 ngut ki dei na Morigaon district. Baroh kiba ioh pang ha Assam, ha ka sngi saitjain ki poi sha ka 159 ngut.

Ha India, kiba ioh pang Covid 19, ki la la nang kiew stet shibun, ha kaba mynta ka jingkhein ka la poi sha ka 1,82,143 ngut, da ka jingdon kiba ioh pang sa 8,380 ngut ha ki 24 kynta ba ladep bad baroh kiba iap, ki la poi mynta sha ka 5,164 ngut, da ka jingdon kiba iap sa 193 ngut ha ki 24 kynta ba ladep. Kane ka jingkhein kaba mynta, ka dei kaba heh tam, ha ka jingbun kiba ioh pang covid ha India, naduh ba kane ka jingpang, ka la sdang pur ha ka Ri baroh kawei.

Ha United States, kiba iap, ki don sa 960ngut ha ki 24 kynta ba ladep bad baroh kiba iap, ki la poi sha ka 1,03,758ngut, kat kum ka jingkhein jong ka Johns Hopkins University.

Ka jingdon kiba ioh pang Covid ha Brazil, ka la poi mynta sha ka 4,98,440 ngut bad kiba iap, ki la poi sha ka 28,834 ngut bad da katei ka jingkhein, ka Brazil, ka la tam ha ka jingdon kiba iap ia ka France.