Nang kiew tyngeh ka khlam coronavirus ha India, nang bun kiba iap ha USA

Guwahati: Sa san ngut ki don kiba ioh pang COVID-19 ha Nagaland bad baroh kiba ioh ia katei ka jingpang, ki la poi sha ka 25 ngut.

U S Pangnyu Phom, myntri ka koit ka khiah ka sorkar Nagaland, u la sam ia katei ka jingtip, lyngba ka twitter jongu mynta mynstep. Kitei kiba ioh pang thymmai, ki dei uwei na Dimapur bad sa 4 ngut na Kohima bad kitei ki dei kiba dang shu wan phai shen na Chennai.

Ha Assam, ki don sa 24 ngut kiba ioh pang Covid 19 bad baroh kiba ioh pang haduh mynta, ki don 880 ngut. Na kitei ki 24 ngut, ki kynthup ia 11 ngut na Goalpara, 3 na Nalbari, 3 na Tinsukia, 2 na Dibrugarh, 1 na Kamrup, Nagaon, Karbi Anglong & Dhubri, katba iwei pat ym pat lah ban pynthikna.

Na kitei ki 880, kiba la koit ki long 103 ngut, 770 ngut kiba dang don ka jingpang bad saw ngut kiba la iap noh.

Kiba pang, hynnin ka sngi, ki don 97 ngut kiba dang shu ioh thymmai bad 92 ngut ha ka 27tarik Jymmang 2020.

Ha India, ka jingpang Covid 19, ka la kiew jubor ha ki 24 kynta ba ladep, da 7,466 ngut bad baroh kiba ioh pang, ki la poi sha ka 1,65,799. Baroh kiba iap, ki la poi sha ka 4,706ngut, da kaba ki don kiba iap 175 ngut ha ki 24 kynta ba ladep. Haduh mynta kiba dang shah sumar, ki long 89,987, kiba la jem ki long 71,105, ong ka khubor na ka tnat ka koit ka khiah.

Ha United States, ki don sa 1,297 ngut kiba iap bad baroh kiba iap ha katei ka ri, ki la poi sha ka 101,573. Haduh mynta, ki don 1,720,613 ngut kiba don ia katei ka jingpang ha katei ka Ri.

Ka la mih ruh ka jing dawa ha ka Jylla Pennsylvania, ia ki nongmihkhmat jong ka seng Republican, ba ki dei ban hiar shuki mardor bad ka daw, ka long namar ba u don uwei u dkhot jong ka iing dorbar, uba don ia ka jingpang Covid 19, hynrei um shym la iathuh briew bad ula buhrieh, la shi taiew kynthih bad katei ka la pynbitar ia ki dkhot jong ka seng Democrat.

Kawei pat ka khubor, ka iathuh ba U Sujit Basu, myntri ka sorkar West Bengal, uba bat ia ka tnat fire and emergency, ula ioh ia ka jingpang coronavirus bad ka lok jongu ruh, ka ioh ia katei hi kajuh ka jingpang, ong ka khubor.