Ym lah ban thied ne die ia ka permit kali, ong U DTO

Shillong, 26 Nailur:
Wat la ka ophis jong u District Transport Office (DTO) ka la ong ba ym lah ban iadie iathied ia ka permit kamai taksi, hynrei ka jingshisha kaba rieh ka long ba ka dor permit kali kamai ha ka nong bah Shillong ka long kaba rem dor. Ka jingtip ba la ioh; ka dor jong kawei ka permit kam duna ia ka T. 1 lak tyngka.
Kane ka jingiadie iathied ia ka permit taksi khamtam ha ka nongbah Shillong, ka long pyrshah ia ka kyndon katkum ka jingtip ba la ai da ka ophis jong u DTO kaba ong ba ia ka permit lah tang ban shu pynkylla na uwei u briew sha uwei lyngba ka jingtip jong ka ophis u DTP, Shillong.
Katkum ka ain wad jingtip paidbah, ka ophis u DTO; ka la ong ba ia ki permit ym lah ban die ne ban thied, hynrei lada don kiba ym kwah ban pyndonkam shuh kin hap ban shu pynkylla (transfer) da ka jingtip jong ka ophis u DTO.
Ka ophis ka la kdew ba la ai permit khadduh ia ki taksi kamai ha ka Shillong naduh u snem 2007 bad ka dei ruh ka jingialang ba khadduh ka Regional Transport Authority (RTA)ka bym pat shym la shong haduh kine ki sngi wat hadien hynniew snem.
Ka por treikam jong ki permit ka long saw snem. Na ka bynta ban ioh permit donkam ban siew tang ka stamp ba T.25 nalor ka EPIC bad ka syrnod na u Rangbah shnong bad u dei ban long u nongshong shnong jong ka East Khasi Hills.
Ka ophis jong u DTO, ka la pyni ba kam shym don satia kano kano ka kyndon ne ka jingbthah ia ka sorkar ban ai permit kyrpang ia ki samla kiba la nang la stad bad ki samla ki bym don kam don jam.
Ha ka jingtip ba la ioh lyngba ka ain wad jingtip paidbah, u DTO u la pyllait permit haduh 92 tylli ia ki kynthei tang hapoh Shillong Region ha u snem 2010-11 bad 27 tylli ki permit kali ia ki dkhot ba wan pyndem ka HNLC, ha kaba la ai na ka Surrender Militant Scheme.