Lap sa 5 ki metiap, kiew sha ka 46

Shillong,26 Nailur:
Mynta ka sngi la lap biang sa 5 tylli ki metiap na North Garo Hills ha ka jingjia shlei um, bad haduh myngta ka jingiap briew ka la poi sha ka 46 ngut. Ha duh mynta ka kynhun ki NDRF ki dang bteng ia ka jingwad ia ki briew kiba dang jah, bad la sngewthuh ba ka jingiap briew kan dang kiew.
Ka surok NH-62 la plie paidbah na bynta ki kali kiba kit jingkit ym gpalat ia ka 9MT, ka surok NH-51 kaba la shah ktah la dep ban pynkhuid bad ki kali kiba sahkut ha Bajeng doba mynta ki la hiar sha Tura.
Ki kali kiba kit marbam mardih la pyniaid lyngba ka surok NH-62 sha Williamnagar bad NH-51 sha Tura. Katto katne tylli ki jaka ai jingiarap kiba la buh ha katei ka jaka la weng noh bad ki briew na kitei ki jaka ki la leit phai ing noh. Ki kynhun iarap kiba la phah shuh shuh sha Garo Hills ki la hiar kyrkieh sha ki jaka ba la kham shah ktah jur ban ai ia ki lad jingiarap.
La pynkhreh ruh da ka liengsuin ka tnad AIF ban pynpoi ia ki dawai ba donkam kyrkieh sha ki jaka ba shah ktah eh, la bthah ia ka tnad Public Health Engineering ban pynbun ia ki top um bad ki pump kti namar ban pynbiang ia nki jingdonkam haba donkam um.
La iathuh ba ha ki katto katne jaka jong ka Khasi bad Garo Hills ka la don ka jingdun lyoh bad ka jingslap jur, bad la phah ia ki Deputy Commissioners ba kin long kiba peitngor ha kylleng ki jaka halor katei ka jingjur slap palat.