U Tymmen bapli, ki pyndonkam bakla ia ka kyrteng jong u:Witing

Shillong,25 Nailur:
“U bah Hoping u dei u briew uba khuid uba suba bad uba shai kdar, hynrei u tymmen bapli ha ka jinglong tymmen jong u um tip eiei ia ka sdang ka kut ruh hynrei la shu pyndonkam bakla pynban ia ka kyrteng jong u” kren diaw u bah Witting Maw sor, Joint Secretary HS PDP haba ia kren bad u Rupang lyngba ka phone mynta ka nohphai sngi.
U bah Witting u la kren mynsiem namar ki la don ki briew jong ka HSPDP kiba la pyndon kam bakla ia ka kyrteng u bah Hopingstone Lyng doh, u President Rangbah ka HSPDP lyngba ka jingsoi jong ki ia ka kyrteng u bah Hoping ha ka kyrwoh kaba la pyllait paidbah sha ki lad khubor, kaba na ka liang u bah Hopign um don jingtip eiei.
Katei ka kyrwoh kaba la soi ha ka kyrteng u bah Hoping ka dei ka jingpynshai ka HSPDP kaba la kynnoh ba ki jingkren u bah Witting sha ki lad khubor uba la ong ba ka HSPDP ka la kyrpad ia u bah Ardent M Basaiawmoit ban ym pynlong jingialang ha ka 19 tarik mynta u bnai ha madan student hynrei um sngap, ki dei ki bym don nongrim bad ki bym don jingshisha hynrei tang ki jingsngew shimet jong u, bad ia katei ka jingpynshai la soi da ka kyrteng u bah Hoping.
“Mar sien iohi ia ki kot khubor, mynhynnin ka janmiet nga la leit ban ia kynduh ia u bah Hoping, bad ka jingiakren ka la neh kumba shi kynta tam, u bah Hoping u la ong ba um don jingtip eiei, bad kam don kaba kum katei ka jingkynthoh pyrshah ia nga, u bah Hoping u la ong ba um don jingtip mano ba pynmih ia katei ka khubor” iathuh u bah Witting haba ia kren bad u Rupang.
Lah ban kdew ba katei ka jingpynmih khubor kaba lah ban ong ba ka dei kaba la shu soi tuh ha ka kyrteng u bah hoping kumba la ong u bah Witting ka dei hadien ka jingialang jong ka HSPDP kaba la long ha ka janmiet jong ka 23 tarik mynta u bnai ha kaba u bah Witting u la ong ba kum u Joint Secretary um don jingtip eiei shaphang katei ka jingialang bad kumjuh ruh ki saw ngut ki MDC jong ka HSPDP kim don jingtip eiei, “Ngim tip mano ba pynlong ia ka jingialang” u la ban biang.
Na ki jingkren u bah Witting la sngewthuh ba ka don ka jingiapher jingmut hapdeng ki nongialam ka HSPDP, hynrei haba la kylli na utei u rangbah la ka don ne-em kaba kum kata, u bah Witting u la kyntait ba ka don ka jingiapher jingmut haduh mynta.