Sngewlem lanot ka Congress, BJP

Shillong, 25 Nailur:
Ka Bharatiya Jana ta Party jong ka Jylla, ka pynpaw ia ka jingsngew lem halor ka jingduh noh ki mynsiem briew ha ka jingshlei um ha Garo Hills bad ha Shil long ruh kumjuh. Ka seng, ka dawa ia ka sorkar Jylla, ba kan siew bai lutksan sha baroh kitei kiba iap.
Ka BJP, ka pynsngew ruh ba ka sorkar Jylla, ka dei ban shim ia ki lad ban teh lakam ia ka jingshlei um, kaba la ju iai jia man la u snem, kaba la pynduh pynjulor bun sha Garo Hills. Ka BJP, ka kyrpad ruh ia ka sorkar India, ba kan phah kham bun ki NDRF sha Garo Hills. U President jong ka seng kmie na Delhi, u phah ia ka jingsngewlem sha kitei kiba la duh ei, ia la ka jingim ha katei ka jingshlei um.
Ka BJP, ka pynrem ia ka jingsiat iap ia ki arngut ki briew kiba na Mookhep, ha East Jaintia Hills bad katei ka dei ka jingbym larkam jong ka sorkar Jylla, na ka bynta ban thaw ia ki ain ha ka jingtih mar poh khyndew bad ban pynsngewthuh ia ka NGT halor ka jingthmu ban tih dewiong ha ka Jylla. Ka BJP, ka dawa ba dei ban tohkit halor katei ka jingjia bad ban siew T.10lak sha kitei kiba la duh ei ia ka jingim.
Ha kawei pat ka khubor, U bah D D Lapang, President jong ka Meghalaya Pradesh Congress Committee, u pynpaw ia ka jingsngewsih halor ka jingduh jingjulor na ka jingshlei um ha Garo Hills, Jaintia Hills bad ha Khasi Hills District ruh kumjuh. U Bah Lapang, u phah ia ka jingsngewlem sha kiba ha iing jong kitei kiba la duh ei ia la ka jingim. Ka seng, ka ai jingkyrshan ia kito kiba iarap lem ia kitei ki riew shem lanot. Ka seng ka sngewkhia jur ruh halor ka jingiap ei jong arngut ki briew ha Mookhep, ha East Jaintia Hills.
Ka MPCC, ka ai jingiaroh ruh halor ka jingiasoi soskular jong ki ar kynhun ka ANVC ha ryngkat ka sorkar India bad ka sorkar Jylla bad ka seng ka shim ba ka jingsuk kan sa wan phai ha ka ka Jylla bad ka iaroh ia ka sorkar Jylla, kaba la shim ia katei ka lynti jong ka jingiasuk bad kitei ki seng kaikhlaw.