Soi soskular ka sorkar India, sorkar Jylla bad ka ANVC Yn nang pynbun ia ki MDC, sha katei ka Council

Shillong, 24 Nailur:
Mynta ka sngi, la ia soi soskular hapdeng ka sorkar India, ka sorkar Meghalaya bad ka ANVC, ha ka ophis jong u myntri kam poh iing jong ka sorkar India, ha ka jingdon jong u myntri kam poh iing, U Rajnath Singh, U Kiren Rijiju myntri khynnah ka tnat kam poh iing, U Mukul Sangma myntri rangbah ka Jylla, ka kong Roshan Warjri myntri kam poh iing ka Jylla, U Anil Goswami, Secretery kam poh iing ka sorkar India, ha ryngkat ki heh sorkar jong ka sorkar India, ka sorkar Jylla bad ki nong ialam jong ka ANVC bad ANVC(B). La don lang ruh ha katei ka sngi, da U Zoramthanga, myntri rangbah ba rim jong ka Mizoram, U Chief Executive Member ka GHADC, ki dkhot jong ka Garo Students Union, FKJGP, ADE, ha ryngkat kiwei pat ki sengbhalang na Garo Hills lem bad ki kotkhubor.
Ki mat kiba la ia mynjur ha katei ka jing ia soi soskular mynta ka sngi, ki long halor ka jing ai bor shuh shuh sha ka Council, ha kaba yn ai ia ka bor, ba kin pyniaid ia ki kam ki duk ha ki nongbah, lyngba ki tnat kiba la shah jied bad ban nang pynbor shuh shuh ia ki dkhot ban mihkhmat sha ka Council.
La rai ruh ba dei ban pynduh pyndam noh ia ka ANVC, kum ka seng, ha ki lai bnai ban sa wan, naduh mynta ka sngi jong ka jing ia soi jingmynjur bad ban weng lut noh ia ki mukotduma, kiba dei bad ki kam pyntriem, kiba dei pyrshah ia ki dkhot jong ka ANVC. Hynrei ia ki kam pyniap briew, lane ki kam rahbor bad ki kam pyntriem ba shyrkhei, yn sa peit da ka sorkar Jylla, katba kum ki jingiadei bad ki jingjia bapher. Ha ki kam kiba iadei bad ka roi ka par, kan dei ka bynta jong ka sorkar India bad ka sorkar Jylla, ba kin peit khamtam, ha ka koit ka khiah, ka pule puthi lem bad kiwei ki jingdonkam.
U Rajnath Singh myntri kam poh iing jong ka sorkar India, u ai khublei ia u myntri rangbah ka Meghalaya, ia ki nongialam jong ka ANVC, ia u ksiang jong ka jingiakren, U PC Haldar, uba mihkhmat ia ka sorkar India bad u kyrmen, ba ka Jylla, kan long kaba shongsuk bad kaba roi stet nangne shakhmat. Ha kajuh ka por, u myntri kam poh iing jong ka sorkar India, u pynsngew ruh, halor ka jingkwah jong ka sorkar India, ban iakren bad kano kano ka kynhun, kaba sangeh ia ki kam pyntriem bad kaba buh ia ki mat jingdawa jongka, ha ki ain jong ka riti synshar ri bad kiba pyni ia ki jingeh, ba ki don.
Ka sorkar Jylla ruh, ka ai jingiaroh ia ki nongialam jong ka ANVC bad ka ANVC (B), ha kaba ki la rai ban sangeh ia ki kam pyntriem bad ba kin wan ban iakren ha ki kyndon jong ka riti synshar ri bad kane kan kdew lynti ia kiwei pat ki seng lehnoh, ba kan kin wan phai sha ka lynti jong ka jingiakren iasuk.