Kiew 38ngut kiba iap, lap sa 13 na Garo Hills

Shillong, 24 Nailur:
Ka State Executive Committee, ba la khlieh da U Chief Secretary, ka ia kynduh mynta ka sngi, na ka bynta ban iakren halor ka jingshlei um kaba jur, kaba la jia ha Garo Hills bad ha ka jingialang, la iathuh ba ka jingiap briew, ka la poi sha ka 38ngut haduh mynta ka sngi, da ka jinglap sa ia ki 13tylli ki met iap, na ki bynta bapher jong ka Garo Hills. La iathuh ruh ba ka NDRF, ka treikam bha mynta ha ki bynta jongka Kharkutta, Bajengdoba bad Resubelpara.
Ka jingtrei ban maramot ia ki surok kiba la sniew, ka dang iaid shakhmat bad kitei ki kynthup ia ki surok ha Garo Hills, kum ka NH-51, AMPT, NH-62, Shillong – Nongstoin- Tura, Garobadha- Ampati- Mahendraganj, Baghmara- Maheshkhola, Chokpot – Sibari, Bajengdoba – Resu, Songsak- Mendipathar, Mendipathar – Damra, Garobadha – Mankachar, kiba la sahkut na ka jinghap khyndew kaba jubor bha. Ka PWD (Road), ka dang trei shait shait na ka bynta ban plie noh ia ka surok NH-51, NH-62, Garobadha – Mankachar, Shillong-Nongstoin- Tura, Damra-Mendipathar bad kiwei de, ha kaba la ailad shwa ia ki kali rit ba kin iaid.
Ki Deputy Commissioner, ki la thaw ia 85tylli ki jaka sah ba shipor jong ki riew shem lanot, ha kaba la ai ia ka bam ka dih ia kitei kiba don ha kitei ki jaka bad kitei ki long 36tylli ha South West Garo Hills, 15tylli ha North Garo Hills, 26tylli ha West Garo Hills, 4tylli ha East Garo Hills, 5tylli ha South West Khasi Hills.