Shillong: Ka Meghalaya Editors and Publishers Association (MEPA) ka la pynpaw ia ka jingsngewsih kaba jur ban tip halor ka jingkhlad noh jong uwei na ki nongthoh khubor uba la rangbah tam ha ka kam thoh khubor, u Bah Varioustar Nongsiej, ha kane ka sngi Thohdieng.
Na ka liang ka MEPA ha ka jingïalang sngewlem kaba long hynne ka sngi ha Mawkhar ka la pynpaw ïa ka jingsngewsih ban duh noh ïa uwei u nongthoh khubor uba la noh synniang ha ka imlang sahlang lyngba ka kam pathai khubor.
Ha katei ka jingïalang kaba la ïalam da u President ka MEPA, u bah Monarch Shabong ha ka jingdon ryngkat ki trai bad ki editor jong ki kot khubor, ka la don ka jingsngap jar kaba ar minit hadien ka jingpyrkhat kam kumno ban leh burom khatduh ïa tei u rangbah.
Ha ryngkat ka jingpyrkhat ïa ki kam, ki dkhot ka MEPA ki la pynkynmaw ruh ïa ka jingsdang jong u bah Nongsiej ha ka kam thoh khubor kata ha u snem 1993 ha ka kot khubor Mawphor bad ka jingdon bynta jong u ha ka kot khubor U Peitngor bad ka kot khubor Kynjatshai kaba u la shakri khatduh haduh ka sngi jingïap.
Ïa u bah Nongsiej, ki para nongthoh khubor ki ithuh kum u briew uba minot bad uba trei shitom khamtam ban pynthikna ba ki paidbah kidei ban ïoh ban pule ïa ki jingjia kiba manla ka sngi.
Ka MEPA haryngkat ka khubor sngewlem kaba ka phah sha ki bahaïing hasem, ka duwai ruh na ka bynta ka jingjahthait ka mynsiem jong u.
Ka MEPA ka la pynpaw ba ki kam noh synniang jong u bah Nongsiej uba long kum u Executive Editor ba mynta jong ka kot khubor Kynjatshai kin ïai pyrto ha baroh.
Ka jingleit ontep ïa u bah Nongsiej kan long lashai ka sngi ha ka por 2 baje nohphai sngi.
Phah jing sngew ka Shillong Press Club sha ka long ing i bah Various Star Nongsiej
Ka Shillong Press Club mynta ka sngi ka dap da ka jingsngew kyndit bad sngewsih kthang ban tip ba i Bah Various Star Nongsiej, u Nongthoh Khubor ba la rangbah bha jong ka jylla bad uwei na ki dkhot ba shit rhem jong ka Shillong Press Club u la khlad noh kynsan ha ka miet jong ka 22 tarik u Jymmang, 2020.
Ka jingkhlad noh jong i, ka long ka jingduh kaba khraw ym tang ia ki para nongthoh khubor, hynrei ia ka jylla hi baroh kawei.
Ka SPC ha ka 23 tarik Jymmang 2020 ka la pynlong ia ka jingialang sngewlem bad pynlong ruh ka jingsngap jar kaba ar minit.
Na ka liang ka Shillong Press Club ka phah ruh ka jingsngewlem sha ka kurim ryngkat bad ki khun baroh ar ngut, U Godwin Warjri bad ka Evansaralyne Warjri.
“Bha, me u shakri ba bha bad ba ngeit, me la minot ha kiba khyndiat, yn ai nong ia me ha kiba bun. To khie leit shapoh ka jing kmen u kynrad jong me”, Mathaios 25:21.
Phi don ban ong eiei?