Weng 7ngut, thung 12ngut U CEM ka KHADC:MDC

Shillong, 23 Nailur:
Ka UDP ka la tyn ruh dieng tyllaw biang ia u CEM ka KHADC u Bah Ardent M Basaiawmoit da kaba kynnoh thungkam ia ki briew jongu ha District Council.
Haba iakren bad ki nongthoh khubor mynta ka sngi Hatmajai, u MDC ka UDP na Umsning u Bah Donkupar Sumer u la ong ba u CEM uba bat ia ka tnad Personnel department u la thung kam ia ki briew da kaba weng ia kiba la dep trei mynshwa hyn niew ngut kum ki peon ha ka 31 tarik Naitung, halor ka nong rim ba ka Council kam don pisa.
U Bah Sumer uba dei u Executive Member ha kane ka Executive Committee u la ong ba hynniew ngut ki nongtrei shi por ha ka Council ki ioh kamai T. 5000 shi bnai.
Hynrei ka jingkam jong u CEM ka long ka thamalu, namar ba hadien ba la pynduh ia ki 7 ngut, u la thung kam biang sa 12 ngut bad ka jinglut na ka bynta ban siew ia kine ka la kot sha ka T.2 lak man u bnai, la ong u Bah Sumer.
Une u MDC ka UDP u la ong ba san ngut ki nongap khlaw la thung ha ka jingsiew kabaT. 13,840 shi bnai.
U la ong ba ar ngut ki nongsar ophis bad uwei u chowkidar la thung ha ka jingsiew kaba T.12,700 katba ar ngut kiwei ki Enforcement Constable la thung ha ka jingsiew kaba T.13,840 shi bnai.
U Bah Sumer u la ong ba u CEM u la thung ruh ia uwei u peon ha ka jingsiew kaba T.12,700 shi bnai.
“Ka EC ka la sah ha ka lyngngoh ia ka jingleh marwei u CEM”, la kynthah u Bah Sumer.
Shwa ia kane, ha ka jingialang paidbah, u Bah Ardent u la ong ba u la thung kam ia ki briew kiba duk bad u sngew kmen haba u ioh ban iarap ia ki briew kiba duk kiba jynjar shisha.