Kynduh MeECL ka Synjuk ki Rangbah Shnong ka Umroi-Umiam ba poi lak tyngka ka bai bording

Nongpoh:Ki nongialam ka Synjuk ki Rangbah Shnong ka Umroi-Umiam Area, mynhynnin ka sngi ki la leit ban kynduh ia ki bor ba dei peit ka tnat bording (MeECL) ha Umiam bad kata ka long ban leit pynsngew ia ka jingeh, kaba la kynduh da ki paidbah nong shong shnong jong ki 24 tylli ki shnong kiba hap hapoh thain Umroi-Umiam ha Ri Bhoi.

Ka nongrim kaba la pynlong ia kitei ki nongialam jong katei ka synjuk ban leit iakynduh ia ki bor ba deipeit ka MeECL, ka dei hadien ba ki la ioh ia shibun ki jingujor na ki paidbah jong katei ka thain, kiba la ujor sha ka synjuk halor ka jingkiew stet ka bai bording hapoh jong katei ka thain, namar la don longiing kiba la iakynduh jingeh ban siew ia ka bai bording, ha kaba ka bai bording ka la poi da ki lak tyngka bad kaba la pynkyndit eh ia ki paidbah ha kitei ki shnong.

Ki nongialam ka Synjuk ki Rangbah Shnong Umroi-Umïam, ba la lamkhmat da u Bah S. Thabah kum u Chairman bad u Bah P.B Sylliang kum u secretary lem bad kiwei ki Rangbah Shnong ki la leit ban ia kynduh ia ka Executive Engineer ka tnat MeCEL, na ka bynta ban pan jingpynshai halor katei ka jingkiewstet ka bai bording ha ki shnong kiba don ha katei ka thain.

Haba kren sha ki lad pathaikhubor, kitei ki nongialam ka Synjuk ki Rangbah Shnong Umroi-Umiam, ki la ong ba ka nongrim kaba la pynlong ia ki ban leit kynduh ia ki briew ka MeECL, ka long ban leit wad jingtip na ki halor ka jingkiew ba syndet syndet ka bai bording sha ki paidbah kiba don ha kitei ki shnong.
Na ka jingujor kaba ki la ioh na ki paidbah nongshong shnong, kitei ki nongialam jong katei ka synjuk, ki la iathuh ba ki la don bun ki longiing kiba la poi ka bai bording da ki phew phew hajar bad don ruh na ki, kiba la poi haduh da ki lak tyngka bad kaba la pynjynjar mynsiem eh ia ki paidbah.
Ha katei ka jingiakynduh, katei ophisar jong ka MeECL, ka la kubur ba ka la don ka jingbakla ha ka rukom sam ia ki bai bording sha ki paidbah bad halor katei ka jingbakla, ka la ong ba dei ka jingbakla na kito ki franchise kiba la shim kontrak ban pynbit pynbiang ia ki bai bording.
Na ka liang katei ka ophisar ka MeECL, ka la ai ka jingkular ba ka kan sa pynbeit noh shen halor kitei ki jingbakla baroh, khnang ba kan ym pynjynjar ia ki paidbah kiba pyndonkam bording ha katei ka thain.