Ka sorkar kam lah ban khanglad ia ka jingwan kit dewiong na Assam: MR

Shillong: U myntri rangbah ka jylla Meghalaya, u Conrad K Sangma myn hynnin ka sngi, ula ong ha ing dorbar, ba ka sorkar jylla kam lah ban khanglad ia ka jing wankit dewiong na Assam, namar ka jing shalan ia u dewiong na Assam la iaid lyngba ki kyndon ka tnat Ministry of Home Affairs (MHA). 

U Conrad K Sangma u la ong ba katkum ki kyndon ka MHA, la mana ba ki sorkar jylla kim lah ban tuklar ne khanglad ia ka jing wankit ia ki mar ba donkam na kawei ka jylla sha kawei pat bad kumjuh ruh ia u dewiong na ka bynta ban pyntrei noh iaki karkhana shna cement hapoh ka thain Jaintia Hills.

Ia kane ka mat halor ka jing wankit dewiong na Assam sha Meghalaya la wanrah da u MLA ka Mawlai konstitwensi u bah PT Sawkmie.
“Lada iaid katkum ka ain, ka sorkar Meghalaya kam lah ban khanglad ia ka jing shalan dewiong na Assam sha Meghalaya, namar ka MHA kala shah ban shalan iaki mar ba donkam na kwei ka jylla sha kawei pat ryngkat bad ka jing iaid ryntih ki kyndon ka MHA bad ka tnat ka koit ka khiah” la bynrap u Conrad K Sangma.

Kumban shu pynkynmaw ka sorkar ha ka 1 tarik u bnai jymmang 2020 ka la shah ia ki karkhana ban sdang pyntreikam kumba 50 percent ryngkat ka jing iaiad beit bad bud ryntih iaki kyndon ka sorkar bad ka tnat ka koit ka khiah. Lah ban pynkynmaw ruh ba dang shen ki paidbah ka thain East Jaintia Hills, wat hapdeng ka ‘lockdwon’ ki la mih paidbah ban pyrshah halor ka jing shah ia ki trok kit dewiong na Assam ban wankit dewiong sha ka thain da kaba kynnoh ba ka jing shah iaki trok na Asssam ban wan pynhap mar sha ka thain kan wanrah ka jing ma iaka jylla baroh kawei namar ka jing pang ‘corona virus’ ka dang jur bha ha Assam. Ki Waheh shnong ruh ha ka 21 tarik jymmang 2020 ki la ia kynduh ia u myntri rangbah ka jylla ban pynsngew ha u ia ka jing pyrshah ki paidbah ban wankit dewiong ki trok na Assam shapoh East Jaintia Hills.Haba dei bad kane, na ka liang u myntri rangbah ka jylla, u la ong ba ka sorkar Meghalaya ryngkat bad ka tnat ka koit ka khiah ka peitngor bha ia ki draibar bad ki ba bud trok kiba wan na Assam bad ia ki ruh la ‘screened’ ha man ki jaka ba ki rung ha ki khyrdop ka jylla.
“Ka sorkar ka la bthah iaki bor district ka jylla ban peit thuh bha iaki trok bad ki kali ba wan na bar jylla kum shibynta ban teh lakam ia ka jing pur ka jing pang ‘corona virus’ hapoh ka jylla” la bynrap u Conrad K Sangma.