“Aiu ki la leh, tang shi pawa ruh na kaba u bah Ardent u leh”

Shillong,19 Nailur:
Ha ka jingialang paidbah kaba u bah Ardent M Basaiawmoit CEM KHADC uba long ruh ha ka juh ka por u Vice President ka HSPDP u la khot mynta ka sngi ha Madan Sudent, la wan ban ia shim bynta da u President Rangbah ka HSPDP u bah Hopingstone Lyngdoh, ka Chairperson ka KHADC kaba long ruh ka MDC ka HSPDP na Mylliem ka kong Teilinia Thang khiew, u Deputy Chairman ka KHADC u bah Pyniaid Sing Syiem uba long ruh u MDC ka HSPDP na Sohryngkham, u bah Latiplang Kharkongor u EM KHADC uba long ruh u nongialam jong ka KHNAM ha iing dorbar Jylla, bad la pyniaid ia ka jingialang da u bah Shemborlang Rynjah u nongialam ka HSPDP na Pynursla bad u nongkitkam HSPDP na East Khasi Hills.
Ha katei ka jingialang shuwa ba u bah Ardent un kren la kren nyngkong eh da u Deputy Chairman KHADC u bah Pyniaid Sing Syiem, bud sa ka kong Teilinia Thangkhiew, u bah Latiplang Kharkongor , bah Hopingstone Lyngdoh bad la kren khadduh da u bah Ardent M Basaiawmoit. Haba kren ha katei ka jingialang ki nongkren ki la ai jingiaroh ia ka EC hapoh ka jingialam u bah Ardent kaba la lah ban trei bun ki kam na ka bynta ka jaitbynriew watla ka long tang khyndiat bnai.
Ka kong Teilinia ka la ong ba ki kam kiba ka EC ka la leh hapoh ka jingialam u bah Ardent ka la pynkhie im biang sa shisien ia ka synshar paidbah, “Aiu ki la leh tang shi pawa ruh na kaba u bah Ardent u la leh” ong ka kong Teilinia ia ki nongkren kynthoh bad ki nongkren pyrshah ia u bah Ardent. Ka la ong ba na ka liang jong ka kan iai don ryngkat bad u bah Ardent ha ka jingiaid lynti jong u ha ki jingtreikam.
U bah Latiplang u la ong ba u bah Ardent kum u CEM u long kum u Maji uba king ia ka lieng ban pynpoi sha ka thong ba la thew ban poi, hynrei hapdeng ki jingtyllun ka por kaba tang khyndiat bnai kata ka lieng ka la sdang ban pei thliew bad u la ong ba ka jingwan jong u sha katei ka jingialang ka long ban set noh ia kita ki thliew kiba la pei ha ka lieng kaba u bah Ardent u king. U bah Latiplang u la kdew ia ki kam ba ka EC ka la leh ha kine ki khyndiat bnai lyngba ka tnad Trade ha kaba ka la leit ban khang ia ki dukan bar jylla ha ki iew ba hap hapoh ka jingpeit jong ka KHADC.