Kiew dor tasam, ka bai thang ding ilektrik

Bah Monarch Shabong

Baroh ki ia ud lut, ia ka jing kiewdor ka bai thang ding ilektrik, ha kine ki sngi, hynrei ka sorkar Jylla, haduh mynta, ka dang sngap mynthi bad ka leh buit tuh ruh, da kaba pynklet da kumne kumtai, na ka bynta ban pynbor ia u paidlang ka Ri Khasi Jaintia, ba un siew ia katei ka dor kaba ki la shna, ki nongtrei jong ka tnat bor ding.

Ka jingshisha, kaba nyngkong tam, ka long ba ka MeECL, ka la shim kabu palat, namar ba ka dei tang ma ka, kaba sam bor ding ia ka Jylla baroh kawei bad katei kam shym map satia, wat ia ki jingkhein, kiba mih na ki shi suka shipiah lane ki shi tyngka ar tyngka, hynrei ka dawa beit thik ba kin siew ki nongthang ding bad nangta, la iohi, ba ka tnat lum pisa jong katei ka tnat, ka dei kaba thurmur bad kaba leh thawsha tasam bad ka daw kaba nyngkong ka long, ba ha ka por pakhang shnong kumne, kim ju leit peit metre bad ki ap, tang ha ka por suk pyrthei, katba kim lehrain satia ialade, ban kam, ba ki trei ha ka tnat essential service bad nangta, haba ka kiew ka bai ding, ki ju kynnoh beit ia u metre uba pli bad ka jing kynnoh, ka long ba kiba bun kim dei kiba stad ban peit metre bad ha kaba khadduh, la shu hap ia siew bym banse.

Mynta ka sorkar India, ka la pynlong pakhang shnong, la ar bnai tam bad ha kine ki ar bnai tam, ym don uwei ruh uba leit trei ne leit wad pisa, hynrei, la shu ia shong bad shu ia bam bad tang ka jinglut suda bad ha kaba kum kane ka por, ka la dei ia ka MeEPDCL, ba kan don kata ka jingsngew para briew bad ba kan map noh, ia ka bai ding jong ki paidbah, na ka bynta kine ki ar bnai ba ladep, namar lada jia ba ka pynbor ban siew (nalor ba ka la khein dor kaba rem), kumta kin sa bun ki ban shah ot bai ding, ha ki bnai ban sa wan.

Haba shu peit, ngi iohi, ba hapdeng kiba trei ban pynmih bor ding bad kiba trei ban lum bai bor ding, ka don ka jing iapher ka bneng bad ka khyndew bad kata ka long, ba kiba pynmih bor ding, ki dang don ka mynsiem jong ka jingsngew kit khlieh ban ai jingshakri, ba ki paidbah kin ioh ding ilektrik; hynrei kine kiwei pat kiba lum pisa, la iohi, kumba ka jing pyrkhat, ka la shlei ha ka janor jongki, tang ban ioh ban oh dor kaba rem, nangta ban pyntieng koh tympan ia ki paidbah bad ban ot ding ilektrik, lada jia ba ki briew kim ioh ban siew bad katei ka dei ka kam thombor bad kaba ngim dei ban ailad ha kane ka juk shai.

Ban pynkut, ngi hap ban shu buh ia u dak jingkylli ia kane ka sorkar khleh khawlang jong ka NPP, UDP, HSPDP, BJP bad kiwei bad kata ka long, la ki sngew iahap ne em ban ai da ka kti kamon bad ban tare biang pat da ka kti ka diang bad kam dei tang katta, hynrei ioh lehse ki sngew pynban, ba kato ka jingsiew T.500 sha acount ki longkmie baduk, ka jingsiew shispah shi sngi, sha ki nongbylla lane T.700 shi taiew lane T.1,000 sha ki misteri, ka dei ba kin ia siew bai light (ym ban thied khaw) bad lada ka long kumta ruh, ka jingkylli, ka long ba kim dei tang kitei, kiba thang ding, hynrei ka sorkar Jylla, ka don ne em ia kata ka jing pyrkhat sngew lem para briew, ia kiba trei ophis, kiba trei karkhana, ki nongtrei kam lajong, ki nongtrei kam niam (kiba don ka tulop kaba rit), ki riew tymmen bad kiwei de, kiba la shu shong iing da ki bun bnai, na kane ka pakhang shnong.