Pynthikna u myntri rangbah, ba ka jylla kam don shuh ia ka jingpang coronavirus

Shillong: Mynta ka sngi la test biang, ia ka nongpang, kaba don coronavirus bad la lap ba ka la jem na ka jingpang.

Lyngba katei ka test, kaba dang shu leh mynta ka sngi, la pynthikna da U Conrad K Sangma, myntri rangbah ka Jylla, ba katei ka briew, ka la koit la khiah bha bad katei ka pyni ba ka Jylla, kam don shuh ia ka jingpang coronavirus.

Na ka liang U bah Prestone Tynsong, symbud myntri rangbah ka Jylla, mynta ka sngi u la pynbna ba ka jylla Meghalaya ka la lait na ka jingpang Covid-19, ha kaba ka briew ka ba ioh ia ka ne ka jingpang Covid -19 hadien ka test kaba ki la dep ban leh mynta ka sngi ka la ioh ia ka jing koit ba pura (negative).

Haba iakren bad ki lad pathai khubor u Bah Prestone Tynsong, u iathuh ba ka jylla Meghalaya ka la lait na ka khlam Covid-19, ha kaba ka test ka ba laioh mynta ka sngi, hadien ka jingleh ia ka test ka ba la dep ha ka sngi saitjain ka long negative bad hadien ka 24 kynta ki la pyndep biang ia kane ka test ha ka ba mynta ka sngi ruh ka test ka long negative bad kane ka briew ka la ioh ia ka jingkoit ba pura.

U Dr A War, u iathuh ba ka jing leh ia ka test ia kane ka briew ka long hadien ka 7 sngi na ka sngi ba la lap ba ka don ia ka jingpang Covid-19, namar ba kane ka briew ka la don lypa ha ka jingleh Quarantine kaba la jan dap 28 sngi bad kumta na ka liang ka koit ka khia ka la ap tang 7 sngi bad ka leh noh ia ka test ha kaba ka result ka ba la ioh mynta ka sngi ka la long negative.

Ha kaba iadei bad ki sample ba la phah test u bah Prestone u la iathuh ba haduh mynta ka sngi ki sample kiba la dep phah test ki long 3207, kiba long negative ki long 2883, ki result kiba dang ap ki long 311; 12 ngut kiba la ioh ka jing koit ba pura bad uwei uba la khlad noh na ka ne ka jingpang Covid-19. U symbud myntri rang bah u la iathuh ba wat la ha ka East khasi hills District haduh mynta sngi ym shem don shuh kiba ioh pang Covid-19 thymmai hynrei ka east khasi hills District ka dang don ha ka Orange Zone bad ban pynbna ba ka la long Green Zone, yn hap ban pynbeit bad ka sorkar pdeng.