400ngut kiba pynkhein ia ka jingleh quarantine ha iing, ong U bah Prestone

Shillong: U symbud myntri rang bah ka jylla u bah Prestone Tynsong, u la buh ka jing kyrpad ia baroh kiba dang shu wan phai ha ka jylla, ba ki dei ban bud ryntih ia ka jingbthah ka tnad ka koit ka khiah ban leh Quarantine ha la ki ing.

Haba ia kren bad ki lad pathai khubor, na ka liang u bah Prestone u la iathuh ba ha kine ki sngi, la lap ba haduh 400 ngut ki briew ki ba dang shu wan phai na ki jylla ba don ha ki Dong shatei lam mih ngi, ba ki la pynkhein ia ka jingleh quarantine ha la iing, da kaba ki la ia mih shabar ha ka 13 tarik u Jymmang 2020.

U la iathuh ruh ba hadien ka jingioh jingtip, na ka liang ki briew jong ka tnad ka koit ka khiah bad ki bor shnong, ki ia la leit ban ia kren ia ki trai ing bad kumjuh ia ki bahaing ha sem jong ki, ba kim dei ban khein sting halor kane bad ki la pynsngewthuh ruh ia ki ba ka long kaba don kam ban bud ia ki kyndon ba la bthah da ka tnad ka koit ka khiah.

Na ka liang u symbud Myntri rangbah u la kyntu ia baroh ki ba wan phai, ba ki dei ban bud pyrkhing ia ka jingleh quarantine ha la ki ing ka ban long 14 sngi, ia ki ba wan phai na ki dong shatei lam mihngi bad 28 sngi ia kiba wan na ki jylla ba shabar ki dong shatei lam mihngi.