Bymioh bainong la 8 bnai, sangeh treikam ki nongtrei Casual ha Dewlieh Farm

Nongpoh: Ki nongtrei Casual Worker kiba don kumba 25 ngut ei ei bad kiba trei hapoh ka Dewlieh Farm jong ka tnat Horticulture, mynta ka sngi ki la iamih paidbah na ka bynta ban pynpaw ia ka jingpyrshah kaba jur halor ka jingbym ioh bainong mynta la 8 bnai kynthih bad lyngba katei ka jingiamih paidbah para nongtrei, ki la shim ruh ia ka rai ban sangeh noh ia ka jingtreikam napoh katei ka Farm, kaba dei ruh kawei na ki Farm kaba pynmih ia ki soh ki pai, ki syntiew ki skut lem bad kiwei kiwei ki jingthung jiingtep.

Katei ka kynhun ki nongtrei Casual Worker, la iadon lang kynthei bad shynrang khamtam ki longkmie kiba la leit ban trei ha katei ka Farm na ka bynta ban pyndap pynbiang ia ka iing ka sem, hynrei ka jingbymioh bainong kaba la palat 8 bnai, ka la pynjynjar eh ia ki bad kaba la pynlong ruh ia ki ba kin shim ia ka sienjam ban sangeh noh ia ka jingtreikam hapoh katei ka Farm, namar katei ka jingbymioh bainong ka la pynsyrtok eh ia ki bad khamtam eh ban pyndap pynbiang ia ki jingdonkam hapoh ki iing ki sem.

Haba ioh ban iakren bad ki ar ngut na kitei ki Nongtrei Casual ka tnat Horticulture bad kiba long ruh kum ki nongpeit hapoh jong katei ka Farm kaba don ha ka shnong Dewlieh, kiba kynthup ia ka Kong Dorathy Lyngdoh bad u Bah Donbok Nongrum, ki la pynpaw shisha ia kata ka jingsngewsih kaba jur halor katei ka jingshah lehbein ka jong ki, namar wat ha katei ka jingeh kaba ki iakynduh, hynrei na ka liang ki ki bor ba dei peit kim shem la shimkhia lane ban pyrkhat lem ia ka jingeh kaba la iakynduh da kitei ki Nongtrei Casual.
Ki la ong ruh, ba lada ka jingshah set Tulop kan long tang 2 lane 3 bnai na ka liang jong ki Nongtrei Casual ruh ki sngewthuh bad kam da pynlong ia ki ba kin shim syndon ia katei ka rai bad sangeh ka jingtreikam hapoh katei ka Farm, hynrei namar ba ki la mad ia ka jingshah set bainong kaba la 8 bnai tam bad ba ki la iakynduh jingeh shaba palat, kam banse ia ki ba kin shim ia katei ka rai bad kata ka long ban sangeh treikam na katei ka Farm.
Ka long ruh kaba sngewsynei ban iohsngew ia ka sur na kitei ki Nongtrei Casual hapoh katei ka tnat Horticulture kaba don ha Dewlieh, namar ki la pynpaw ba nalor ba ki ioh duna ka jingsien, hynrei sa ka jingshah set bainong, kaba lah ruh ban ong ba ka la dei ka dawbah jong ka jingeh kaba ki iakynduh kum ki Nongtrei Casual.
Lah ruh ban kdew hangne, ba katei ka Farm kaba don ha shnong Dewlieh, ka dei kawei na ki Farm kaba la pawnam bha hapoh ka jylla, namar ka jinglah ban pynmih ia ki soh ki pai, ki syntiew ki skut lem bad kiwei, hynrei ka long pat kaba sngewsih ban ioh ba wat hapdeng ka jingtrei shitom bad len lade da ki Nongtrei Casual hapoh ka ka Farm, la iohi bad lap ba ka tnat Horticulture kam shem la shimkhia ban pyrkhat lem ia ka jingeh jong kitei ki Nongtrei Casual.