Thaw committee Covid-19 ka HFU, pyntip sha u myntri ka rep ka riang

Shillong: U President jong ka Hill Farmers Union (HFU) sengkmie u Bah Commander Shangpliag, u la pynbna ba ka seng ka la thaw ia ka Committee kaba kyrpang jong ka seng ka ban ai jingmut kumno ban iarap ia ki nongrep kiba iakynduh jingeh na ka daw jong ka khlam “CoVID-19.

U Bah Shangpliang u la iathuh ba ki dkhot jong kane ka committee kaba kyrpang ki kynthup ia u Chairman, jong ka Meghalaya Industrial Development Corporation , u President, ka SPIKAP & Federatin of Khasi State, u CEO, jong ka NABARD Foundation, u Head, Advisory & Consulting, NeDFi, u STO, UNDP (NE Region), u Adviser, jong ka Hill Farmers’ Union, u Director, jong ka Ai-THAN u dkhot barim jong ka SVP (Tech). AB Minacs bad kumjuh ruh u General Manager jong ka NABARD, Shillong.
U bah Shangpliang u la iathuh ba kane ka committee kan iarap ban ai jingmut ban wanrah ia ki mat kiba kyrpang ban iarap ia ki nongrep bad kiwei ki bynta kiba iadei bad ka rep ka riang. Na ka bynta ban wanrah ia ki tiar technology kiba thymmai ban kyntiew ia ka rep ka riang, na ka bynta ka food processing bad kiwei kiwei.
Na ka liang jong ka seng ka la pyntip ruh sha u Myntri ka tnad ka rep ka rep, ka riang halor ka jingthaw ia kane ka committee, kaba kyrpang bad na ka liang jong u myntri u la pynpaw ba u kloi ban ai ka jingkyrshan na ka bynta kino kino ki kam kiba dei na ka bynta ban kyntiew ia ka rep ka riang.
Hadien ka jingai jingmut jong kane ka committee na ka liang jong ka seng kan sa leit rah sha ka sorkar na ka bynta ban ioh ia ka jingmynjur, la bynrap shuh shuh u bah Shangpliang.