La dep siew lypa ka sorkar ia ka bai rel na bynta ki samla ba wan nabar ka jylla:Prestone

Shillong: U symbud myntri rangbah ka jylla, U bah Prestone Tynsong, mynta ka sngi u la iathuh ba na ka liang ka sorkar jylla, ka la dep siew lupa ia ka bai rel na ka bynta kito ki samla ki ban wan phai sha kane ka jylla ha kine ki sngi ban wan.

U bah Tynsong, u iathuh ba ia kane la rai mynta ka sngi ha ka ba ka sorkar ka la dep ban siew lupa ia ki bai rel, na ka bynta ki khun samla ki ban wan phai sha ka jylla. U la ong ruh ba ki khun samla kiba sahkut ha ki jylla bapher bapher kim dei ban khuslai ia ka bai rel, namar ba ka sorkar ka la dep ban shim wai lupa ia ki rel ba kyrpang ban wan buh ia ki haduh Guwahati Railway station. U la iathuh ruh ba ka sorkar jylla kan pynbiang ia ki kali ban leit shaw na Guwahati bad ban pynpoi ia ki sha la ki jong ki shnong kiba ki sah.

U la iathuh ba ki rel ki ban wan ki long, na Chennai ka la dep ban mih mynnin ka sngi bad kan poi ha Guwahati ha ka 15 tarik u jymmang 2020, kaba na Gujarat kan mih ha ka 15 tarik U Jymmang 2020 bad kaba na Bangalore kan mih ha ka 16 tarik u Jymmang 2020 bad ia kine ki rel baroh ka sorkar jylla ka la dep ban siew ia ka bai rel.

U la iathuh ruh ba na ka liang ka sorkar jylla ka la dep ban thoh sha ka Tnad Rel jong ka West Bengal, Maharashtra, Telengana, Kerala, Uttar Pradesh, Delhi, Rajashthan, Andhra Pradesh, Uttarakhand, Punjab, Bihar, Haryana, Goa, Pondichery, Madhya Pradesh bad Jharkhand ban kyrpad ia ki ban ai ia ki rel ba kyrpang ban wan buh ia ki khun samla ka jylla ha Guwahati.hynrei ha duh mynta ym pat ioh kano kano ka jubab na ka liang jong ki.