Ka ri India ka dei ka kper jong baroh ki jait ktien, ong u Prof SS Majaw

Shillong, 16 Nailur:
U President barim ka Khasi Author Society (KAS) u Prof. S.S. Majaw u la ong ba ka ri India kadei ka kper jong baroh ki jait ktien bad u la kyntait shi syndon ia ka jingong jong ki katto katne ba kadei ka iing ki biej jong ki jait ktien.
Haba kren kum u kongsan ha ka jingiatai nia halor ka phang “Ka ktien lajong ka jingkdew ia ka jinglong kyrpang ka kolshor ba la pynlong da ka All India Radio, Shillong ha Don Bosco Youth Centre, Laitum khrah mynta ka sngi, u Prof. Majaw u la ong ba u iohi ia ka India kum ka ri kaba kynthup ia baroh ki jait ktien, ryngkat ki jait bynriew bapher ba pher, ki kolshor. U la ong ba ka ktien kaba kren da ki paidbah kum ka ktien ka kmie, ka don la jong ka dor bad ka jaka ha ka imlang sahlang. U la pynpaw ia ka jingsngewthuh ia ka jing mut ka ktien lajong, da kaba ong ba ka dei ban long kaba na tynrai kaba kyrpang jong kano kano ka jaitbynriew.
“Kano kano ka jait ktien kaba kren da ki paidbah dei kaba im bad ka bym kren shuh, ka dei kaba la iap”, la ong u Prof. Majaw, bad u la ai nuksa kum ka ktien Latin kaba la kren ha ka por jong ka Hima Roman, ka dei kawei kaba la iap ha ka pyrthei. Haba kdew ia ka ktien kum ka jinghikai, u Prof. Majaw u la pynpaw ia ka jingiaroh ia u kpa ka India u Mahatma Gandhi uba iasaid ban kren da ka ktien lajong. U la ong ba ka ktien lajong ka dei ka dohnud bad kiwei ki ktien kum ki ktien jong ka jabieng”.
Katba ka Prof. M.B. Jyrwa kaba ai ia ka jingkren lamphang ka la iaroh ia ka jingtrei ka All India Radio, Shillong ban pynlong ia kum kane ka rynsan ban iakren ia kane ka phang kaba donkam ban pynneh ia ka ktien. Ka Prof. Jyrwa u la ai jingmut ba ia ka ktien lajong dei ban pynneh da kaba pyndonkam ha ki skul, ha ki kolej, ha ki skulbah bad ha ki lad pathai khubor. Ka la ong ba ka kolshor jong ki jaitbynriew ka mih na ka jingkren ia ka ktien lajong naduh dang rit.
“La ioh ia ka kolshor na ki ktien ba ki kren na ki kmie ki kpa naduh dang rit”, la ong ka Prof. Jyrwa bad bynrap ba ki khun ki bym don kmie ki ioh na kito ki briew kiba ri ia ki.
Ka la ong ba ka ia jylla Meghalaya la phiah na ka Assam namar ba ka sorkar Assam ka kwah ban pynrung jubor ia ka ktien Assamese ia ki Khasi. Ka jaitbynriew Khasi kam pdiang ia kane ka jingthmu ka Assam ban pynrung jubor ia ka ktien Assamese bad ki la dawa ban ioh la kajong ka jylla.
Ha kane ka jingiatai, la ioh ruh ia ka jingkern na ka Dean School of Humanity, NEHU, Prof. Badaplin War, Prof. A. Kharmalki ka Khasi Department, NEHU. U Deputy Director (Programme) ka All India Radio, Shillong, u E.W. Dkhar, u Assistant Professor ka Khasi Department, NEHU, Prof M. Khymdeit. Ka nonghikai ka Khasi Department, Sankar Dev College, Shillong, Kong Sukjai Swer ka la pyniaid ia ka jingiatai. La ioh ruh ia ka jingrwai na u Bah David Lartang bad ka kynhun jongu.
Ka Deputy Director General (Programme) ka All India Radio, Shillong Ka kong N. Shadap ka la pdiang sngewbha bad u Assistant Director, North Eastern Service ka All India Radio, Shillong, Bah Arkin Pariat u la ai khublei.