Ka Meghalaya, ka jylla kaba ioh rit tam ia ka bhah pisa na ka sorkar India

Shillong: Ka Sur U Paidbah Hynniewtrep (SUPH), ka la pynpaw ia ka jingsngew lehrain halor ka jingshah lehbein ka sorkar Meghalaya, ha ka sorkar U Narendra Modi, da kaba ki kynnoh, ba ka ioh duna palat ia ka bhah pisa, ha kiba kum kine ki sngi kiba hiran bha bad ka SUPH, ka shim ba katei ka dei ka jingleh niewbein ia ka Jylla.

Halor kane ka phang, la iohi ba ka sorkar Meghalaya, ka ioh T.4,091.66lak, na ka bhah jong ka 15th Finance Commission, kaba la tip kum ka Devolution Revenue Deficit Grant during 2020-21.

Ha ka thup, ba la pynmih da ka tnat pla pisa jong ka sorkar India, la iohi ba ka Assam, ka ioh 63158.33lak, nangta ka Manipur ka ioh 23,533.33lak, ka Mizoram, ka ioh 11850.00lak, ka Nagaland, ka ioh 32641.66lak bad na baroh ki 13 tylli ki jylla kiba ioh jingiarap, la iohi ba ka Meghalaya, ka ioh ia ka bhah kaba rit tam, ha kaba wat ia ka Mizoram, kaba dei ka jylla kaba rit tam ha ka thain shatei lam mihngi, hynrei la iohi, ba ka jingioh kam iahap wat tang mar shiteng ruh.