Bah RM Shabong
Ka pakhang shnong, ka la bteng mynta la ar bnai tam eiei bad haba peit na ka jinglong jingman jong ka Jylla, la iohi, kumba kata ka jingtieng ia u khniang jingpang corona, ka la kham thanda, na kaba long ha kito ki sngi, ba dang shu sdang ka pakhang shnong, kaba dei ha U Lber 2020. Hynrei ka jingkylli haneng, ka long pat shaei lut ki don kine ki myntri jong ka sorkar Meghalaya Democratic Alliance (MDA) kiba don lang ia kajuh ka jing kitkhlieh, ban iakhun ia ka jingpang corona bad ban pyniaid ruh ia ka roi ka par jong ka Jylla hi baroh lang.
La iathuh ba ki don ki myntri, kiba la bate, ba kin peit ia la ki jong ki jaka, kum ka nuksa ia U Ma Lahkmen Rymbui, uba peit ia ka Jaintia Hills lem bad ki paralok myntri bad ki MLA bad nangta sa U James K Sangma, myntri sam bam, uba peit ia ka Garo Hills; hynrei ngim ju iohi, ba kitei kin kren eiei lane ba kin pyni ia ka jing iakhun ia ka jingpang corona ha ki thain jongki lane ba ka bit ka biang, ka jing pynkhreh ia ka bam ka dih, ka shong ka sah bad ter ter. Ka phang, ka long namarkata, ba lait noh na u myntri rangbah bad u myntri rangbah ba ar, la iohi, ba kiwei pat ki 9,10 ngut ki myntri, imat ki don mynta ha ka por jong ka jing shongthait, wat la ngi dang iohi tang ia u myntri ka koit ka khiah, uba mih bar, ban iakhun ia ka jingpang corona.
Ka tnat PHE, ka dei kaba ju kitkhlieh bha ia ka swaach bharat jong ka sorkar India bad lehse, ha kaba kum kane ka por, ka donkam bha, lada ka peit ia ka khuid ka suba jong ka Jylla lane ia ka umbam umdih jong ki paidbah, ka tnat sam bor ding, ka dei sa kawei pat ka tnat kaba donkam, ba kan mih ban kren ia ki lad ki lynti ban iarap ia ki lak ngut ki nongthang bor ding, ka tnat pynroi nongkyndong, ka don shibun ki lad ban iarap ia ki duk ki raitoi, ki tymmen ki kro, ki thei iaplok lyngba ki skhim jongka, ka tnat social welfare bad wat ka tnat PWD (hynrei haduh ha kine ki sngi, ngi iohi, ba wat u myntri PWD, um ju kren eiei ia ka tnat lajong), nangta ka tnat pynroi sor, katei lei ka don ia ka jing kitkhlieh kaba khia, ia ka jingkhuid ki nala um, ki surok shnong, ki niut ki nier bad kumta ter ter.
Kampher, lada jia ba ki la shong kynjah, ha ki ar bnai ba ladep, hynrei ka la dei namarkata ka por ia ki 12 ngut ki myntri ka sorkar Jylla, ba kin sdang noh ia la ki kam, namar ba kam lah ban long ba ngin shu ia shu ia rieh lut hapoh iing la jong; hynrei ka la dei ba ngin thaw ia ki lad ki lynti ban sei ia ki kam ki duk, ba u duk u raitoi, un ia ioh kamai jakpoh bad kumba la don bun kiba ong, ba ngi hap ban iaid shakhmat ban wad ia la ka jakpoh, wat lada ngi dei ban ia iaid ryngkat ryngkat bad ka jingpang corona.
Kaba dei!!!