AI JINGIARAP KA DORBAR SHNONG PYNTHORUMKHRAH GOLFLINKS SHA KI NONGNIAH TAXI

Shillong: Ka Dorbar Shnong Pynthorumkhrah Golflinks lyngba ka Core Committee kaba la thaw ban peit ia ki kam ki jam kiba iadei bad ka jingpang COVID-19 ha ka shnong, ha ka step jong ka 12tarik Jymmang, 2020 ka la lah ban noh synniang da ka pisa sha ki nongshong shnong kiba im ja kpoh da kaba kamai kali ha Golflinks.

Kane ka jingiarap ka long hadien ba ka committee ka shem ba ki nongniah kali kamai ki dei kiba shah ktah eh ha kane ka Lockdown ba la wanrah da ka Sorkar ban iada ia ka jingsaphriang u khniang jingpang COVID – 19. Nalor ki jingiarap ba la noh sha ki nongniah kali, ka Core Committee ha kine ki shibnai ka la ioh ban iarap pisa sha bun ki longing kiba duk kiba donkam ban thied ia kiwei kiwei ki jingdonkam nalor u Khaw, u Dai, u Phan, u Piat, ki Jhur bad kiwei kiwei.

Ia kine ki jingiarap pisa sha ki nongniah kali bad ki nongshongshnong la noh synniang da ki dkhot ka Core Committee bad ia ka jingkyrshan ba radbah la noh da U Bah Michael Hek, uba long u Rangbah Shnong bad ha kajuh ka por u Chairman ka Core Committee.