Lada u tang u wei u nongpang Covid-19 un ioh iaid mon, ka jingjot ka kham palat ban ia ka jingbthei u nuclear bomb

Scholar Lawriniang (Nongthliew WKH)

Khlem da peit shiliang khmat lane niew bein iano re iano, hynrei ngan kren salonsar kumba dei ban kren ban wanrah ia kaei kaei kaba bha ka donkam ia ka jingiatrei, bad jingiasnohkti lang ka kti ka mon ka kti ka diang ka jong nga jong phi la ka long bad ka Sorkar, ne ha kano kano ka kynhun, wat ha iing ha sem khlem ka jingiatrei lang hi kam lah ban ban saindur ia ka lawei kaba bha.

Baroh ngi la tip lut shaphang ka jingshyrkhei ka khlam Covid-19, hynrei ngan shu pynkynmaw sa shisien namar ba ka long kaba ma bad kaba shyrkhei haduh katta katta lada tang u wei u nongpang u ba don ia kane ka jingpang un ioh ban iaid katba mon khamtam lei ha ki jaka paidbah. Namar tang u wei u khniang Virus u lah ban ktah bun ngut ki briew, kat kum ka WHO ka iathuh ba tang u wei u briew u ba don ia kane ka jingpang virus ka lah ban ktah ia 4 ngut tam kiwei pat (4.7) ki briew ki ba ia jan bad kito kiba don ia kane ka jingpang, bad na u to u ba ioh thymmai ruh kumjuh kan ktah hi kumta. Bad ka bor jong u kumba ngi tip hi u kham shun eh ia kiba la kham noh rta kiba 60 snem shaneng.

Kumta na ka jing iabit u wei ia u wei pat ka la nangjur bad pur sted ka jingiabit bad kane ka sa ktah wat ia ka pyrthei baroh kawei haduh ba ki tiar thma ba khlain bor kin ym lah ban bad kim iahap kyrdan eiei ban ia nujor bad ka jingkhlain bor jong u ban pyniap ia ki briew, bad ka Sorkar ka dei ban peitngor bha hapoh ka jylla ioh ba ka don kum kane ka jingjia. Namar lada don kiba pang kiba iaid shane bad shatai ha ki jaka paidbah da kaba pynkhein noh ia ki aiñ ba la buh kan wanrah ka jingjot ba shyrkhei la kum ba bret da u kyndok ding ia ka pyrthei.

Kumta Ka sorkar ka dei ban shim ruh ia ki ain ha kti ia kum kine ki jingjia la da don. Namar katkum ka jingbthah ka sorkar ban pyntrei kam ia ki aiñ ka long kumne:-

1. Section 269 Indian Penal Code: Kano kano ka jingleh thurmur bad khlem phikir ha ka ban pynphriang ia kino kino ki jingpang kiba ktah ia ka jingim briew, ka jingpynshitom ka long ban set patok 6 bnai bad ka kuna (Fine).
2. Section 270 Indian Penal Code: Kano kano ka jongleh khnang bad khlem akor ha ka ban pynphriang ia ka kino kino ki jingpang kiba ktah ia ka jingim briew. Ka jingpynshitom ka long ban shah set patok 2 snem bad ka kuna. (Fine)
3. Section 271 Indian Penal Code: kano kano ka jinglehkhnang bad leh pyrshah ia ka hukum ban pynsaphriang ia ka jingpang ( quarentine rule) ka jingpynshitom ka long ban set patok 6 bnai bad ka kuna (Fine).
   Kumta ban teh lakam ia kane la jingpang ba kan ym saphraing ka sorkar ka donkam ban pyntrei kam ia ki aiñ kumba la buh ban pynbna paidbah hi da ka sorkar hi, namar lada ym pyntrei kam kan wanrah ka jingma bad ka jingjot ba khraw ia ka jaitbynriew.