M.M. Thaiang
Kiba bun na ki nongshong shnong ka Rilum Jaiñtia ki long ki nongrep. Haba ong nongrep ym tang ba ki rep tang ïa u Kba, hynrei ïa kiwei de ki rukom rep. Ki Nongrep ki rep ïa ki symbai bad ki jait jyngthung bapher bapher kat kum ka jaka bad dei na kane ka daw ba hangne ha Rilum Jaiñtia ngi shem ba don da ki spah ki jait jyngthung jyntep kiba ngi lah ban ïoh na kane ka Ri. Na kine ki jingrep don ki jait kiba ïaid iew bha kum u Khaw, u Kba, u Neilieh, u Nei-ïong, u Riewhadem (Saru), u Krai, u Shynrai Lakadong, u Shynrai Lasheiñ, u Syieng met, u Syieng Tro (Syieng makhir), ka Shriew, u Salah (Phan ba bun jait), u Sohmynken bad bun kiwei pat ki jait jingrep kiba ïaid iew nalor ki Jhur, ki Sohsaw (ki Sohsaw ba bun jait), ki Soh ba bun jait kum u Sohniamtra, Sohjew, Sohsarmat, Sohsalong, Sohsakhne, u Paikdait, u Paiwamon, u Kwai, u Pathi bad kiwei de kiba ngi bam man ka sngi.
Ïa kine ki jait jyngthung la rep ha kane ka Rilum Jaiñtia kumba la hikai naduh mynbarim khlem don kano kano ka jingïapher laitnoh tang kiwei ar ki jait jyngthung kiba la rep ha ka juk kaba thymmai kaba mynta wat la katta ruh kine ki jait jyngthung ki im ki san kat kum ka por jong ki. Ka Ri Jaiñtia ka la pynmih shibun ki jait marbam kiba kynthup ïa ki soh ki pai, ki jhur ba bun jait, u phan, u salah, u sohsaw, u sabaingon, ki shriew ba bun jait, u sohmynken, u shynrai (Lakadong bad u Lashein) bad kiwei de ki jait kiba lah ban shalan shabar ka Jylla lane wat shaduh bar ri. Halor ka jingstad bad ka jinglah jong ki nongrep ban rep ban riang, la ïohi pat ba ka sorkar kam lah ban ai jingïarap kaba pura ïa ki nongrep. Hooid ym lah ban len ba ka sorkar ka ju ïarap ïa ki nongrep, hynrei kata ka jingïarap kam shym la lah ban pynpaw pyrthei. Lada phai sha ka liang ki Dawai Sboh, na ka liang ka sorkar ka shu sam da ki Dawai sboh kiba khlem da test ïa ka khyndew jong ki Nongrep lada kine ki sboh ki ïadei ne em bad ka jaka jong u nongrep.
Ha ka thaiñ Labang-Nongphyllut bad Pangam Raliang ïa kumba long mynta ka khyndew bad ka Mariang hi dalade ka long kaba sboh bad ñiar ba ki nongrep kane ka thaiñ ki donkam bad pyndonkam ïa ki sboh dawai ban pynsboh ïa ka khyndew naba ka khyndew hi dalade ka long kaba sboh. Ki Nongrep nalor ba ki rep Kba kum u Kba Sabiah Wasting, kba Sabiah waiong, kba Wapnah, kba Tadong, kba Naka, Kba Watlang, Kba Maro, Kba Yuha, ki rep ruh ïa kiwei de kum u Krai soh, Krai malu, Riewhadem, Neilieh, Nei-ïong, Syieng, Laha (Wax), Sohbaingon, Shriew, Sohmynken, Synsar (Rep Suro), Shyrmit (Shynrai Lakadong), Shynrai Lashein, ki Jhur bad kiwei de ki jingrep.
Ha ka thaiñ pdeng jong ka Rilum Jaiñtia wat la ka jaka ka long kaba la sbohlypa, hynrei ha ka jingkwah ba kan nangsboh shuh shuh ki nongrep ki pyndonkam da ki dawai sboh (Chemical Fertilizers ba bun jait) bad shisien ba ka khyndew ka la mat sboh dawai lada ym ïoh dawai sboh kato ka jaka kam sboh shuh bad kylla blat bad shisien ba ka la kylla blat ki jyngthung jyngtep ruh kim da mih bha eh. Ki nongrep ki ong ba ka sboh kaba bha tam ïa ki ka dei ka sboh Shyieng, hynrei ïa kane ka sboh kaba kham ïadei bad ka khyndew hapoh ka District ym shym la kham ïoh shuh mynta lane supply da ka sorkar ha kata ka rukom ba ki nongrep kin ïoh pyndonkam ïa ka ha ka rukom kaba dei. Ha ka liang ki dawai ki dashin kum ki dawai khniang kiba ïadei bad ka bam khñiang u Kba, ka jingbam tram (ïap tram) ki Diengsoh, ki Kwai, ki Pathi, ka jingïapstai ki soh ki ralam bad kiwei de ki jait jingbam khniang ki jyngthung jyngtep. Hapoh ka District ka don ka Agriculture bad ka Horticulture Department kiba dei ki Tnat sorkar ba dei peit ïa ka kam rep bad ki kam thungsoh thungpai bad kiwei, ki la dei ban wad bniah ïa ki lad ki lynti bad ki dawai ki dashin kiba kumno ban ïarap ïa ki nongrep ha kaba ïada ïa ki jyngthung jyngtep jong ki na ki khñiang bad na ka jingïap tram ki soh ki ralam.
Kiba bun ki nongrep ha ka pyrthei bad ha ki katto katne ki bynta jong ka Ri India, ki la ïaid ha ka juk stad rep ka juk mynta pynban ha Rilum Jaiñtia wat lada ka long ka Rilum kaba ïadei bad ka rep ka riang kim pat tip ne bna eiei shaphang ka rukom rep ka juk mynta. Ki Nongrep jong ka Rilum Jaiñtia ki la nangrep da ka rukom rep kaba la hikai da ki longshwa manshwa haduh kine ki sngi. Kan jin da la long kaba bha shibun lada ki stad rep jong ka juk mynta kin pynlang lang ïa ka jingstad kaba rim bad ka jingstad kaba thymmai khnang ba ki nongrep kin nang kham lah ban pynroi ïa ka rep ka riang jong ki bad ban nangkham lah ban pynmih shibun ki jingmih na ka rep ka riang jong ki.
Ka don ka jingong ba ka kam rep kam riang ka dei u “BUDLUM” jong ka kiew ka hiar jong ka ri. Ka jingkiew ka rep ka riang bad ka jinglah jong ki nongrep ban pynmih shibun ki mar rep ki pynlong ïa ka Ri hi baroh kawei ban biang ka bam ka sa bad ieng hala ki kjat khlem da ïapan kylliang na kiwei pat ki ri. Ha ka pyrthei ka juk mynta ka rep ka riang ka la dei ban ïaid bad kiew shakhmat pynban lada ïanujor bad ka jingmih kaba ki nongrep ki la pynmih ha ki snem kiba mynshwa lah ban ong ba mynta ka la nanghiar nanghiar na ka jingmih kaba mynshwa, ka daw ka long ba ki nongrep jong ka ri kim lah shuh ban rep ban riang da ka bor met bad la donkam da ki kor ki bor jong ka juk mynta.
Ha Rilum Jaiñtia ïa ka bynta ba shaphang khappud bad ka Ri Bangladesh ki nongshong shnong ha ka jaka ban rep Kba, ki rep da ki Soh, ki Pai, u Kwai, u Pathi bad hangne hangtai lah ban ïohi ba ki shu rep Kba (Jhum Cultivation) malu mala da kaba rep lum hangne hangtai katba ha ka thaiñ pdeng bad ki bynta ba shaneng jong ka Rilum Jaiñtia, ki nongrep ki shaniah ha ka jingrep kba kaba shu rep shisien shisnem bad kata naduh u bnai April (Ïaiong) haduh u bnai October-November (Risaw-Naiweng) nangta ka khyndew ka sah shrah naduh u bnai Naiweng (November) haduh u bnai Lber (March).
Ha ki snem kiba mynshwa ki nongrep ki kham pynlut por tang ha ka rep kba bad rep jhur ha Kper ha Phrah tang ban pyndonkam ïa ka jingbam kaba hala ka sngi, katba nangïaid ka por ki nongrep ki rep ym tang ïa u kba, ki rep de ïa u Syieng (Ginger), u Sohsaw, u Shynrai Lakadong, u Shynrai Lashein (Chyrmit Lakadong-Chyrmit Lasheiñ), u Phan, ka Shriew bad ïa kiwei de ki jait jhur kiba ïaid iew bha ha Iew ha Hat. La ju ïohsngew na ka por sha ka por ba ka rep ka riang ka dei “U BUDLUM” jong ka ri bad ka sorkar ka ong ba ka imsngi ban ïarap ïa ki nongrep, phewse wat ïa ka sboh Dawai kaba ki nongrep ki ïoh pahuh ha ki snem kiba mynshwa mynta kim kham ïoh shuh. Ha ki snem kiba mynshwa ka sorkar ka ju ïarap bad ki nongrep ki ïoh ïa ka “SUBSIDY” kaba shitengdor kaba ïarap ïa ki nongrep ban ïoh jingïarap khyndiat khynsoit ïa kane ruh kumba long mynta la ong ba kam don shuh.
Ha ki snem kiba mynshwa haba dang duna briew, ka jingrep jingriang ka biang ki Hali ki Pynthor, hynrei katba nangïaid ka por ki briew ki la nangbun nangbun, katba ki jaka rep (Ki Hali ki Pynthor) ki sah ki juh. Nangta kiba rep lum ruh kim lah ban rep ha ka juh shi kajuh ka jaka, hadien ba ki rep arsnem ki la hap iehnoh synlai bad kynriah ha kawei pat ka jaka rep bad hadien bun snem kin sa wan rep biang ha ka juh ka jaka kaba ki la iehsynlai bun snem.
Kaba shu rep tylliat hajuh shi hajuh man ka snem kato ka khyndew ka blat noh bad ban pynsboh ïa ka la donkam ban ber ïa ki sboh dawai na ka por sha ka por haduh ban da ïoh ot ïa uto u kba lane kheit ïa u soh jong uto u jyngthung. Ka jingrep ha ka juk kaba rim, ka jingbym don ki kor ki bor ka juk rep kaba mynta bad ka ka jingpyndonkam ïa ki dawai sboh khlem da don ka jingtest ïa kato ka khyndew la ïohi ba katba nangïaid ki snem ka rep ka riang ha Rilum Jaiñtia ka la nanghiar nanghiar bad kane ka jinghiar ym tang ba ka pynduh ïa u nongrep shimet lane ïa ka ïing ka sem jong u, hynrei ka ktah ruh ïa ka ïoh ka kot jong ka ri baroh kawei.
ka rep ka riang ha ka thain ri war