U symbai kba bad ka sboh, noh synniang U CEM JHADC

Jowai:U Chief Executive Member (CEM) jong ka Jaiñtia Hills Autonomous District Council (JHADC) u Ma Thombor Shiwat, ula kner la ka kti jingiarap da kaba synniang da u symbai kba bad ka sboh sha ki paid nongrep hapoh ka constituency jong u, ha ka sngi ba Ar.

“Kane ka jingsynniang jongnga da kine ki sboh bad symbai kba ia ki paidbah nongrep kadei kum shibynta ban kyrshan ïaki paid nongrep kiba shah ktah na ka jingkhang khyrdep (lockdown),” la ong u CEM Ma Thombor Shiwat.

U CEM ula iathuh ba ia mynta ula mang ban ai sha ki 700 ngut ki nongrep. Ia kine nongrep kiba la shah ktah bha bad kiba ym don lad shisha ban thied ia kine ki symbai bad ki sboh dawai ban rep ban riang la jied da ki Waheh Shnong na ki shnong bapher bapher.